Махачкъалада “КIвалахдалди таъминардай къуллугъдин ва бизнес-сообществодин амадагвилин алакъаяр виликди тухун” лишандик кваз конференция кьиле фида, хабар гузва РД-дин карчивилин ва инвестицийрин рекьяй агентстводи.
Конференциядин сергьятра аваз пленарный заседание, гьакIни “КIвалахдалди таъминардай къуллугъди ва кIвалахдалди таъминарзавай ксари санал зегьмет чIугун. Сергьятламишнавай мумкинвилер авай ксар кIвалахдалди таъминарун” месэладай элкъвей стол кьиле тухуда. Абурун сергьятра аваз кIвалахдалди таъминардай къуллугъди ва кIвалахдалди таъминарзавай ксари санал зегьмет чIугунин нетижалувал хкажунин, сергьятламишнавай мумкинвилер авай ксар кIвалахдалди таъминарунин, зегьметдин базардин алай вахтунин шартIара кIвалахдалди таъминардай къуллугъди кьунвай чкадиз, лазим къуллугъчияр жагъурунин карда бизнесди ийизвай истемишунриз талукь месэлаяр веревирдда.
Конференция кьиле тухузвай вахтунда гьакIни жегьилар патал кIвалахдин чкайрин “Агалкьунрихъ сад лагьай кам” ярмарка кьиле фида, аниз кIвалахдалди таъминарзавай карханайрин векилар желбда ва кIвалахдихъ къекъвезвай жегьил ксар патал лазим вири къуллугъар теклифда.
Гьа са вахтунда конференциядин сергьятра аваз РД-дин зегьметдин ва яшайишдин рекьяй вилик финин министерстводинни карчивилин сообществодин ва кIвалахдалди таъминарзавайбурун итижар майдандиз акъудзавай государстводинбур ва алишверишдинбур тушир тешкилатрин (кIватIалрин, союзрин, ассоциацийрин) арада зегьметдин базарда стратегиядин жигьетдай амадагвал авунин гьакъиндай икьрар кутIундайвал я.
Мадни и серенжемдин сергьятра аваз бизнес-тренеррин Сад лагьай Милли “Бизнес-Микс” марафон ачухда ва кьиле тухуда. АНО “Финанс-групп” ДО-ди тешкилнавай и марафонда Россиядин шегьеррай тир 20-далай гзаф спикерри, пешекарри ва бизнес-тренерри иштиракда. Абуру 70-далай гзаф мастер-классар тешкилда ва бизнес кьиле тухун патал лазим чирвилер, меслятар гуда. Марафон 2017-йисан 1-9- июлдиз кьиле фида.
«Лезги газет»
