Агалкьунри шадарзава

Ахцегьрин 3-нумрадин умуми образованидин школадихъ (АООШ) хъсан гьазурвал авай рушарин волейболдин команда ава. Мартдин вацра Огни шегьерда волейболдай тухвай турнирда ада 1-чка кьуна. Амма и кардай командадиз гана кIанзавай Гьуьрметдин грамота къени адав агакьнавач. Идалай гуьгъуьниз и командади РД-дин кIвенкIвечивал патал турнирда иштиракна. Ана 2001-2002-йисара дидедиз хьанвай рушарин 7 команда къугъвана. И акъажунра 3-нумрадин АООШ-дин волейболисткайри сифте Махачкъаладин командадин винел 2:0 гьисабдалди гъалибвал къазанмишна. Финалда абуруз Кьурагь райондин команда кумукьна. ИкI, Ахцегь райондин волейболисткаяр 1-чкадиз ла­йихлу хьана.

Кьиблепатан Сухокумскда волейболдай тухвай турнирдани чи рушарин командади 1-чка кьуна. Вири къугъунра и командадик квай Марьям Гьабибул­лаева, Нажабат Бабаева, Гуьлбиче Чубанова, Пери Ис­маилова (командадин капитан), Юлия Крамар, Ирада Къазиева, Камила Кьасумова, Изабелла Зейналова, Жасмина Шагьбанова, Айиша Гуьлметова (тренер Б.Нурагьмедов) тафаватлу хьана. Умудлу я хьи, 3-нумрадин АООШ-дин волейболисткайри чун гележегда цIийи агал­кьун­ралди шадарда.

Рагьидин ЭМИНОВ