Чи амай школайрихъ хьиз, Ахцегьрин 3-нумрадин ООШ-дихъни вичин футболдин команда ава. И школадин руководстводи ва педколлективди адал гьахълудаказ дамахзава. Районда тешкилзавай гьар жуьре акъажунра и команда гьамиша тафаватлу жезва. Адан тренерар и школадин физкультурадин муаллимар тир Шекербег Мурадов ва Мурад Юзбегов я. Инин жегьил спортсменри алай йисан эвелдай тешкилай мини-футболдай райондин турнирда 2-чка кьуна.
Мукьвара мини-футболдай тухвай акъажунра команда 1-чкадиз лайихлу хьана. Са шумуд юкъуз кьиле фейи къизгъин къугъунра хъсан футболистар тир Мирзебег Кисриев, Гьажимурад Эмиржанов, Аслан ва Алан Къадирбеговар, Гьамид Эминов, лап гъвечIи яшара авай футболист (2-классда кIелзава) Билал Гьажиев иллаки тафаватлу хьана. И агалкьун жегьил футболистриз педколлективди хушвилелди тебрикна. Школадин завхоз Шагьбан Абасова командадиз футболдин туп пишкешна.
Турнирдин спонсорвал авур “сельсовет Ахтынский” СП-дин кьил Низам Эфендиева командадин футболистриз спортдин махсус формаяр, гьуьрметдин грамотаяр ва кубок гана. 3-нумрадин ООШ-дин футболдин командади “Ахцагь” тIвар алай стадиондал тренировкаяр тухузва. Умудлу я, абуру гележегдани школадин педколлектив ва аялар чпин агалкьунралди шадарда.
Рагьидин ЭМИНОВ
