Агалкьунар раижна

18-20-майдин йикъара Астраханский областда  Вирироссиядин жинсинин лапагриз ва цIегьериз талукьарнавай  18-выставка кьиле фена.

Приволжский райондин Пушкинан тIварунихъ галай сагъламардай центрадин мулкунал уьлкведин хипехъанвилин  70-далай виниз майишатри чпин агалкьунар раижна, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.

Хипехъанриз  чухсагъул  лугьун патал выставкадиз Россиядин Федерациядин  хуьруьн майишатдин министрдин сад лагьай­ заместитель Жамбулат Хатуов, РФ-дин Минсельхоздин малдарвилин ва жинс хъсанарунихъ галаз алакъалу крарин рекьяй Департаментдин начальник Харон Амерханов, Астраханский областдин губернатор  Александр Жилкин, Россиядин хипехъанрин Милли союздин председатель Михаил Егоров, гьакIни уьлкведин 20-далай артух регионрин АПК-рин органрин руководителар, алимар атанвай.

Дагъустандин делегациядин кьиле РД-дин хуьруьн ма­йи­шатдин ва недай суьрсетдин мини­стр Мусафенди Ве­ли­мурадов ва минис­тер­ст­во­дин са жерге маса къуллугъчияр, Россиядин хи­пе­хъан­рин­ Милли союздин член Абдусалам Хожоков, Дагъустандин фермервилин майишатрин ва хуьруьн ма­йи­шатдин кооперативрин  Ассоциациядин президент Абдурагьман Абуриков авай.

Чи республикадин 15  майишатдин  векилри выставадиз тушинрин, андивийрин, лезгийрин ва Дагъустандин дагълух жинсерин лапагар гъанвай. Абурукай чIехи пай выставкадин медалриз лайихлу хьана.

Дагъустандин жинсинин хипехъанвилин майишатри къизилдин — 12, гимишдин — 7 ва буьруьнждин 5 медаль къазанмишна. Выставкадин пишкешриз “Восток-2” СПК-дин председатель Оруж Каратов ва “Чох” агрофирмадин заведующий Рашид Хутуев лайихлу хьана.

Мусафенди Велимурадов Дагъустандин делегацияди выставкада иштиракунин нетижайрал рази яз амукьна.  Ада гьисабзавайвал, чи республикада хипехъанвал виликди тухунин кIвалах илимдихъ галаз иллаки сих алакъада хьун, лапагрин жинс хъсанарунин кIвалах датIана тухун лазим я. ИкI хьайила,  республикадивай базар виниз тир еридин саралди ва якIалди бес кьадарда  таъминариз жеда.

Выставкадин сергьятра аваз “Сар твадайбурун шоу” конкурс, балкIанраллаз, девейраллаз чамарар авунар (скачки) кьиле фена.