Агьалийри разивалзава

Ахцегь районда чпин хиве авай жавабдар везифаяр гьакъисагъвилелди тамамарзавай медицинадин къуллугъчияр тIимил авач. Къу­ру­ка­ларин медпунктунин заведующий  Имам  Магьму­довни (шикилда) ахьтинбурун жергедай я. РД-дин здра­­во­ох­ранени­дин лайихлу работник тир адаз райондин кьилин больницадин (ЦРБ) руководстводи са шу­муд­ра пулдин премияр ва гьуьр­метдин грамотаяр гана. Ада­ ина 1964-йисалай зегьмет чIуг­­­­вазва. Тежрибалу мед­ра­бот­никди вичин кIвалах план-графикдин бинедаллаз тешкилнава.

Къулай пуд кIваликай ибарат тир хуьруьн медпунктуна азарлуйриз къуллугъ авун патал чарасуз тир тадаракар, бес кьадар дарманар ава. Адан кIвалахдилай агьалийри разивалзава.

Инин медсестра Г.Азизагъаевади чкадин жемятдихъ галаз профилактикадин серенжемар кьиле тухузва, меслятар гузва. Ада, мукь­вал­-мукьвал хуьруьн школадиз физ, аялрин сагъламвилел гуьзчивалзава. Учетда авай залан азарлуйриз, кIвалериз физ, куьмекарзава. Кьилин категориядин фельдшер И.Магьмудова медпунктунин учетда авай гьар са касдиз кьилдин карточкаяр туькIуьрнава. Гьа са вахтунда азарлуйриз чешнелудаказ къуллугъзавай и медидарада столар, стулар куьгьнебур я.

Умудзава хьи, ЦРБ-дин руководстводи и месэладиз фикир гуда.

Раидин  Эминов