Мегьарамдхуьруьн райондин администрациядин пресс-къуллугъди хабар гайивал, РД-дин милли политикадин рекьяй министрдин заместитель Арсен Магьмудова ва Мегьарамдхуьруьн райондин кьил Фарид Агьмедова райондин агьалияр кьабулна. Ана райондин кьилин заместителар тир Гьабибуллагь Мурадалиева ва Марта Абдуллаевадини иштиракна.
Мярекатдал райондин агьалийри эхиримжи йисара чпик лап секинсузвал кутазвай месэлаяр раижна. Абурукай кьилинбур школа, цIийи поликлиника эцигуниз, газ тухуниз, рекьер туькIуьруниз талукьарнавайбур тир.
Тагъуя Тагьировади ва Наталья Говоровади районэгьлийриз медицинадин рекьяй къуллугъзавай поликлиникадин месэла къарагъарна. Абурун гафаралди, 1970-йисара общежитие хьиз ишлемишай и дарамат алай вахтунда куьгьне хьанва, ам алай аямдин медицинадин рекьяй агьалийрин сагъламвал хуьниз кутугнавай ерилу шартIаралди таъминарнавач. Н.Говоровади къейд авурвал, районэгьлийрихъ галаз санал пограничникрин хизанарни и поликлиникадик акатзава. Ада алай аямдин истемишунриз жаваб гудайвал тадаракламишнавай поликлиника райондиз чарасуз герек тирдакай лагьана.
Арсен Магьмудова и месэла гьялун патал вичивай жедай вири куьмекар гудайди малумарна.
Оружба хуьре школа эцигунин месэла анин директор Рабия Къагьримановади раижна. Ада школадин аялри пуд сменада кIелзавайдакай лагьана. Фарид Агьмедова хуьре школа эцигун федеральный программадик кутунвайдакай хабардарна.
Райондин Къиличханрин, Хожа-Къазмайрин, ЦIийи хуьруьн, Азадогълидин, Ярукьваларин, Оружбайрин хуьрерин кьилери цIийиз эцигнавай гужлу подстанциядик чпин хуьрерин линияр кутун тIалабна. Райондин кьили токдин линияр куьгьне хьанвайди ва кардик квай подстанциядин кIвалах тIебиатдин шартIарилай аслу жезвайди къейдна. Винидихъ тIвар кьунвай хуьрер цIийи подстанциядик кутун патал вири серенжемар кьабулдайдахъ абуру чеб умудлу тирди лагьана.
Азадогъли хуьруьз газ тухунин кIвалахар башламишна са шумуд йис я. 500 кIвал авай хуьруьн пудай са пай газламишнава. Хуьруьн интеллигенциядин векилри и кар тамамвилелди кьилиз акъудун патал А.Магьмудовавай куьмек тIалабна.
Райондин агьалийри кардик квай Оружба-Ярукьвалар-ЛукIар рекье асфальт тунин месэлани кудна.
Агьалийри къарагъарай месэлаяр А.Магьмудова фикирдиз къачуна ва абур кьилиз акъудиз куьмек гун хиве кьуна.
Гьазурайди — Земфира Бабаева
