“Голос” проектда сад лагьай чка кьуна, Россияда виридалайни хъсан сес авай  манидар лагьай виниз тир тIвар къачур, ЦIийи йисан вилик чи халкьдин руьгь лап цавун аршдиз хкажна, чи рикIер шадарай Селимаз виш сеферда аферин!

Аферин Селим хана-хвена, къенин и кукIушрихъ агакьарай адан диде-буба Мая Акимовнадизни  Абдулазиз Абдулселимовичаз! Сагърай  и мярекатдилай вилик “Лезги газетда” Селимакай еке макъала кхьена, чи халкьдиз СМС-дин къайдада адаз сесер гуниз эверай чи къагьриман хва, журналист Даш­демир  Шерифалиев.

Заз гьич са шакни алачиз лугьуз­ кIанзава, Селимаз неинки лезги халкь­дин векилри, гьакI музыкадал рикI алай, Селиман бажарагъди гьейранарай маса дагъустанвийрини, вири Россиядин миллетрини сесер гана.

За Селима къачунвай и еке агалкьун сифтени-сифте адан диде-бубадиз, багърийриз, Ахцегьрин ва КьакIарин жемятриз, санлай вири чи халкьдиз мубаракзава! ­Селимахъ инлай кьулухъ мадни  еке агалкьунар жедайдахъ за кIеве­лай инанмишвалзава.

Гьелбетда, уьлкведин дережада аваз кьиле физвай и еке ва къизгъин акъажунра виниз тир дережадин тIвар къачун — им зарафатдин кIвалах туш. И карда касдал гьикьван гуж акьалтзаватIа, гьикьван нервияр герек къвезватIа кьатIунун четин кар туш. И кIвалах фикирда кьурла, Селима къазанмишнавай тIварцIин къимет, адан дережа мадни гзаф артух жезва. Селимаз гьавайда чи аямдин Муслим Магомаев лугьузвайди туш. Адан неинки гьейранардай сес, мани тамамардай къайда , сегьнеда вичи-вич кьиле тухунин тегьер, гьакI тIварни кваз (Муслим — Селим)  Магомаеваз ухшар я.

Селима вичин виниз тир дережадин искусстводи неинки вичин гъвечIи хуьруьн, Дагъустандин, гьакI вири Россиядин тIвар лап гьа и мукьвал вахтунда вири дуьньяда машгьурдайдахъ зун кIевелай агъунва. Иншаллагь!

Омар Гьуьсейнов,
ДГУ-дин профессор

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя