2017-йисан 5-июлдиз Дагъустан Республикадин искусстводин лайихлу деятель, Дагъларин уьлкведин музыкадин культурадик еке пай кутур машгьур композитор Падиша Физлидинович Киберов рагьметдиз фена.
Падиша 1941-йисан 16-сентябрдиз Докъузпара райондин Филерин хуьре дидедиз хьана. Юкьван школада кIелдай вахтунда гележегдин композиторди и берекатлу чилин жумартвилер къанихвилелди къачуна, фикирдай абур руьгьдин сафунай яна, гьа идалди ада гзаф йисара вичиз яратмишунардай бине яратмишна. Юкьван школа куьтягьайдалай гуьгъуьниз Падишади райондин Культурадин кIвале художественный руководителвиле кIвалахна. Амма бажарагълу жегьилди чIехи агалкьунрихъ ялзавай. ИкI, 1967-йисуз Падиша Махачкъаладин музыкальный училищедин тардин классдиз гьахьна. Анаг агалкьунралди куьтягьайдалай гуьгъуьниз яратмишунрин рекье кIвалахиз башламишна.
Вичин вири уьмуьрда Падиша Киберова бегьерлудаказ ва галатун тийижиз халкьдиз къуллугъна. Ада вич лезги халкьдивай, адан къадим культурадивай къакъатна яшамиш хьун ерли фикирдизни гъанач. Дагтелерадиодин халкьдин алатрин оркестрдин солист ва Даггосуниверситетдин гьа ихьтин оркестрдин руководитель яз, П.Киберова руьгьдиз таъсирдай авазар яратмишна. Абурукай гзафбур (“Яргъи руш”, “Дагъустан”, “Сусан булах”, “Хуш я рикIиз зи”, “Темпелдин фикирар”, “За къизилгуьл низ гурай”, “Дуствилин мани”, “Къизилдин тупIал”, “Алагуьзли” ва мсб.) лезги халкьдин музыкадин къизилдин фондуна гьатнава. И манияр Дурия Рагьимовади, Ризабала Агъабалева, Айдунбег Камилова, Гьава Аллагьвердиевади, Рамиз Лачинова, Суьлгьия Гьажиевади, Тарлан Мамедова, Роза Максумовади, Малик Мустафаева тамамарна. Падиша Киберован манияр халкьдиз гзаф кIанда, абур саки вири мехъеррал ва межлисра лугьузва. П.Киберова Лезгийрин муздрамтеатрдин хейлин тамашайризни музыка кхьена.
Лезгийрин шаир, манидар ва актер рагьметлу Айдунбег Камилова вичин интервьюйрикай сада икI лагьанай: “Падишагь Киберов кьетIен жуьредин инсан я. Адахъ михьи лезги тав ава. Адан манийрихъ яб акалдайла, заз жув Кетин дагъдин кьилел алаз, жуьреба-жуьре цуькверихъ ни акалзавай хьиз жеда…”.
Эхиримжи вахтунда П.Киберова халкьдин инструментрин Государстводин оркестрда, гьа са вахтунда Т.Мурадован тIварунихъ галай 5-нумрадин искусствойрин школадани кIвалахзавай.
Чна, вири мукьва-кьилийри, ам чидай вирибуру хъсан инсан, машгьур композитор рагьметдиз финихъ галаз алакъалу яз дериндай хажалат чIугвазва, хизандиз, багърийриз башсагълугъвал гузва.
Мурад Саидов, композитор, шаир.
