“Абилимпикс” — Дагъустанда

3-4-октябрдиз Дагъус­танда  сифте сеферда яз набут ва сергьятламиш хьанвай мумкинвилер авай ин­­санар патал тешкилнавай,  пешекарвилин бажарагъ къалурунин “Абилимпикс” фестиваль кьиле тухуда.

РД-дин зегьметдин ва яшайишдин рекьяй вилик финин министерстводин жегьилар кIвалахдалди  таъ­минарунин рекьяй “Агалкьун” центради хабар гузвайвал, мярекат  Каспийск шегьердин аялринни жаванрин  спортдин “Энергия” центрада кьиле фида.

15-августдиз РД-дин Гьукуматдин Председатель Абдусамад Гьамидова Дагъустан Республикадин  сергьятламиш хьанвай мумкинвилер авай ксар патал  пешекарвилин бажарагъ къалурдай конкурсрин сад лагьай “Абилимпикс” чемпионат тешкилунин ва кьиле тухунин месэлайрал машгъул жедай рабочий десте  тестикьарна.

Адан составдик 16 кас акатнава. И дестедин асул везифайрикай сад жегьил пешекаррин устадвал винел акъудунихъ элкъуьр­навай международный “Жегьил пешекарар” (WorldSkills Russia, JuniorSkills Russia) ва “Абилимпикс” конкурсар Дагъустанда кьиле тухунин нетижада пешекарвилин тешкилатар ва рабочий кадрияр артухарунихъ галаз алакъалу месэлаяр гьялдайла, республикадин властдин органрин арада алакъалувал таъминарун я.

“Абилимпикс” чемпионатдин программадик  набут ва сергьятламиш хьанвай мумкинвилер авай ксарин арада экспертар ва бизнес-тешкилатдин векилар алай чкадал 7 жуьре хилерай акъажунар кьиле тухун ква. Акъажунрин иштиракчийрихъ гьар са хиляй  хьайи нетижайриз юкьван образованидин идарайрин преподавателар  ва карханайрин векилар  тир 50  экспертдикай ибарат жюриди къимет гуда.

Гъалиб хьайи ксариз республикадин вилик квай карханайра кIва­лах жагъурдай мумкинвал жеда.

«Лезги Газет»