И нумрада чна «Лезги газет» кӀелза­вайбурун вилик Фаикь Жанмирзоева вичин чӀалариз теснифнавай «Ялама – Наб­ран» мани гъизва.

Жанмирзоев Фаикь Сейфединан хва 1964-йисуз КцӀар райондин ТӀигьиррин хуь­ре дидедиз хьана. Ам 1986-йисалай­ инихъ лезги манияр тамамарзавай «Шагь­набат» кӀватIалдин иштиракчи я. И машгьур кӀватӀалдин тӀвар ван тахьай кас, заз чиз, бажагьат жагъида. «Шагьнабатдин» манияр мехъеррикни межлисрик­ чи манидарри тамамарзавай вахтар зи рикӀел лап хъсандиз алама.

«Шагьнабат» кӀватӀалдихъ галаз санал Фаикьа къенин юкъуз 12 альбом акъуд­на­ва. Бажарагълу автордин хкатнавай цӀуд­ралди манияр халкьдин арада фадлай машгьур хьанва. Мисал яз, чавай абурун жергедай лезги медениятдин «къизилдин фондуна» гьатнавай «Телли», «Чан диде», «ТӀигьиррин хуьр», «Сара», «Къуншидин руш», «Чан ширин», «Сенгер булах» ва масабурун тӀварар кьаз жеда. Къейд ийин хьи, «Шагьнабат» дестеди Бакуда, Сумгаитда, Саратовда, Москвада, Сургутда, Махачкъалада, Каспийскда ва гзаф маса шегьерра концертар гана.

«Шагьнабат» кӀватӀалдиз ва абуру хайи халкь патал чӀугвазвай яргъал йисарин зегьметдиз гьуьрмет авун яз, чна газетдин къенин нумрада кӀелзавайбурун вилик «Ялама – Набран» манидин нотаяр гузва.

Къуй Фаикь Жанмирзоевахъ ва «Шагь­набат» кӀватӀалдин вири векилрихъ чандин сагъвал, мадни зурба агалкьунар хьурай.

______________________________________________________________

Ялама – Набран

Фаикь  Жанмирзоев

Гьуьлуьн кьере къайи ятар,

Серин тарар, серин шагьвар.

Гьар са пата тIуьнар-хъунар,

Кеф тушни бес чи Набранда?

Тикрарбенд:

Чан Ялама, чан Набран,

РикIиз хуш ватан я вун,

Гьар гатуз са кеф чIугвадай

Женнетдин макан я вун.

Муьшкуьр рукан дередавай,

Каспий гьуьлуьн тередавай,

Чи халкьарин рикIе авай,

Хуьх жуван тIвар вине авай.

Мурад  Саидов