27-29-июлдиз Смоленск шегьердин “Юбилейный” спортдин дворецда азаддиз кьуршахар кьунай спортдин ветеранрин арада Россиядин ачух чемпионат кьиле фена. Уьлквединбурухъ галаз санал ана мукьвал тир къецепатан уьлквейрин са жерге командайрини иштиракна. Шад жедай кар ам я хьи, нуфузлу и акъажунра Дагъустандин дестедик кваз 69 йисан яшдавай чи машгьур пагьливан, РД-дин физкультурадинни спортдин лайихлу работник Къариб Ашуралиевани агалкьунралди иштиракна.
70 килограммдин заланвал авай уьлкведин зурба пагьливанрин арада 1-чка кьуналди, ада къизилдин медаль къазанмишна. Спортдин ветеранрин арада 2 сеферда Европадин чемпион ва 2 сеферда дуьньядин чемпионатда гимишдин медалдин сагьиб тир ада гила 5-сеферда РФ-дин чемпионвилин титул тестикьар хъувуналди, мад сеферда дуьньядин чемпионатра иштиракдай ихтияр къачуна. Лезгийрикай спортдин ветеранрин арада Къариб Ашуралиев ихьтин гьуьндуьр дережадиз хкаж хьанвай сифте пагьливан я.
Азаддиз кьуршахар кьунай Дагъустанда СССР-дин спортдин сад лагьай мастер Абдулали Гъаниеван ученик хьайи, вичин баркаллу стха (имидин хва), зурба пагьливан Руслан Ашуралиеван ирс-рехъ лайихлудаказ давамарзавай Къариб Ашуралиева Смоленскдай хтайла, ингье, чаз вуч лагьанатIа:
— Яшлу кьилихъ зун уьлкведин ва дуьньядин гьасиррал, гьелбетда, тIвар ва я медалар патал экъечIзавач. Уьмуьрлух Ахцегьа ДЮСШ-да тренервиле кIвалахиз хьайи зун хуьруьн жегьилриз жуван хсуси чешнедалди тарс-тербия гуз, абур спортдин гъалибвилерал руьгьламишиз, къастунал кIеви, ватанперес халисан пагьливанар тербияламишиз алахъзава. Акъажунрин и рекьера заз куьмекзавай, зи къуватрихъ инанмиш ксариз ва чешне къачуз кIанзавай жегьилриз чухсагъул…
Къуй, Къариб стха, ваз Аллагьди чандин сагъвал, яргъи уьмуьр гурай, дуьньядин чемпион жедайвал ви руьгьдинни бедендин къуватар артух хьурай, — дамахдивди алхишзава чна адаз.
Дашдемир Шерифалиев
