И йикъара Сулейман-Стальский райондин Уллу-Гъетягъ хуьре цlийикlа туькlуьр хъувунвай кьуршахар кьадай зал ачухунин мярекат кьиле фена, — и гьакъиндай «Лезги газетдиз» Сулейман-Стальский райондин администрациядин пресс-къуллугъди хабар гузва.

Ана райондин кьил Нариман Абдулмуталибова, райондин кьилин сад лагьай заместитель Лацис Оружева, образованидин управленидин начальник Къачабег Аминова, спортдин, туризмдин ва жегьилрин крарин рекьяй Комитетдин директор Надыр Эфендиева, Уллу-Гъетягъ хуьруьн кьил Гьабиб Гьуьсенбегова, хуьруьн агьалийри, депутатри, жемиятдин тешкилатрин ва СМИ-дин векилри иштиракна.

Къейд ийин, 40 квадратдин метрдин майдандин спортзал хуьруьн медениятдин дараматда, хсуси инвестицийрин гьисабдай ачухнава. Кьуршахар кьадай цlийи залда 25 пагьливандиз спортдал машгъул жедай мумкинвал ава.

Райондин кьил Нариман Абдулмуталибова хуьрера ихьтин жуьредин спортзалар ачухунин важиблувал къейдна ва и баркаллу кардиз 500 агъзур манат чара авур Гьуьсенбеговрин хизандиз сагърай лагьана.

Мярекатдал жегьил спортсменрин адресдиз хейлинбуру хъсан келимаяр лагьана, абурухъ спортдин рекье чlехи агалкьунар хьун тlалабна.

Къейд ийин, мярекатдин сергьятра аваз Фейзудин Гьуьсенбегова ММА-дай дуьньядин чемпион ва грэпплингдай приздин сагьиб Уллу-Гъетягъ хуьряй тир Надим Гьуьсенбеговав шад гьалара «Toyota Camry» маркадин автомобилдин куьлегар вахкана.

Куругъли Ферзалиев