25-февралдиз Махачкъалада РД-дин къенепатан крарин министр Абдурашид Мегьамедован пресс-конференция кьиле фе­на. Анал ада СМИ-рин векилриз алатай йисуз министерстводи кьиле тухвай кIвалахдин нетижайрикай суьгьбетна, жур­налистрин са жерге суалриз жавабар гана.

А. Мегьамедова хабар гайивал, шаз Да­гъустанда кIеви ва акьалтIай кIеви тахсиркарвилерин кьадар 22 процентдин тIимил хьана. Республикада алатай йисуз арадал­ атай вири тахсиркарвилерин умуми кьадардикай рахадайла, ада къейд авурвал,­ угъривилин, таланчивилин, маса касдин­ чандиз хасаратвилер авунин кьадарни агъуз­ аватнава. Министрдин фикирдалди, Да­гъус­­танда тахсиркарвилерин кьадар тIимил хьун, сифте нубатда, участокрин уполномоченный полицейскийри кьиле тухвай кIва­лахдин нетижа я.

Анжах им республикада къанун-къайда­дал амал авунин жигьетдай вири хъсанзава­ лагьай чIал туш. А. Мегьамедован гафаралди, тирякдихъ галаз алакъалу тахсиркарвилерин вилик пад кьун хци месэлайрикай сад яз амукьзава. «Алай йисан январдин вацра­ ихьтин тахсиркарвилерин кьадар садлагьа­на са шумуд сеферда артух хьана. Эгер 2024-йисан январдиз тирякдихъ галаз алакъа­лу 133 тахсиркарвал винел акъуднайтIа, алай йисан эвел кьиляй абурун кьадар 430-дав агакьна. Им, гьакъи­къатдани, республика патал акьалтIай хци месэла я», — къейдна ада.

Министрди алава хъувурвал, шаз къа­нун-къайда хуьдай органрин векилри маса гузвайбурувай 180 килограмм тиряк вахчуна. Синтетикадин тиряк арадал гъизвай кьуд лаборатория тергна, 15 наркопритон агална. Тирякдихъ галаз алакъалу тахсиркарвилерай 2200 уголовный дело къарагъарна.

Конференциядал министрди журна­лист­рин суалризни жавабар гана. Абурукай гегьеншдиз «Дагъустан» РИА-дин сайтдай кIелиз жеда.

Агьмед Магьмудов