Алатай гьафтеда РД-дин Гьукуматдин Председателдин заместитель Нариман Абдулмуталибов ва РД-дин хуьруьн майишатдин ва недай-хъвадай суьрсетдин министр Мухтарбий Аджеков Хасавюрт райондин Костекрин хуьревай сар гьялзавай “Маяк М-1” карханадиз мугьман хьана.
И карханади йикъан къене юкьван гьисабдалди 11 тонн сар гьялзава ва гуьгъуьнлай ам Белоруссиядани Китайда маса гузва.
Н.Абдулмуталибова къейд авурвал, хуьруьн майишатдин и хилез республикадин руководстводи кьетIен фикир гузва. “Урусатда гьялзавай сарин 25 процент Дагъустандал ацалтзава. И кар хъсандиз къайдадик кутуни кIвалахдай алава чкаярни арадал гъидай мумкинвал гуда. Вири и месэлаяр чна республикадин руководстводал агакьарда”, — лагьана Н.Абдулмуталибова карханадин векилрихъ галаз кьиле фейи гуьруьшдал.
М.Аджекован гафаралди, алай вахтунда Дагъустанда сар гьялзавай са шумуд кархана ава, амма абурун къуватривай республикадин хипехъанрин игьтияжар тамамвилелди таъминариз жезвач. Гьавиляй и хилез государстводин патай куьмек гудай серенжемар кьабулун герек я.
«Лезги газет»
