Меркезда республикадиз къвезвай мугь­манар, туристар кьабулзавай идарай­рин, дараматрин (мугьманханаяр, кьилдин ксарин кIва­лер,­ гьаятар…) хатасузвал хуьниз талу­кьарнавай тежрибадин семинар кьи­ле фена. Ана Дагъустандин туризмдихъ галаз алакъалу идарайрин, МЧС-дин, Рос­потребнадзордин, МВД-дин ва маса орган­­рин, мугьманханайрин векилри иштиракна.

Сифте гаф рахай РД-дин туризмдин ва халкьдин художественный сеняткарвилин рекьяй министр Эмин Мерданова къейд авурвал, эхиримжи кьве йисуз республи­кадиз къвезвай туристрин, мугьманрин кьадар хейлин артух хьанва. Гъилевай йисуз абур мадни гзаф хьун мумкин я. Кар алайди ам я хьи, абуруз ял ядай хъсан шартIар, къуллугъар авунни тешкилна кIанда.

— Сифте нубатда абурун хатасузвал хуьдай серенжемар герек я. Къуллугъ авунин жигьетдай жезвай куьлуь-шуьлуьйриз абуру са артух фикир гудач. Эгер хатасузвилин жигьетдай мугьманар хуьн тавуртIа, ида туризм вилик тухуниз екез кьецI гуда, — лагьана Э. Мерданова.

Семинардал шегьердин МЧС-дин, МВД-дин, Роспотребнадзордин векилар рахана. Абуру мугьманханайра рехъ гузвай нукьсанрикай лагьана,   мугьманриз вири рекьерай хатасузвал тешкилуниз талукь меслятар, теклифар гана.

Хийир Эмиров