Чаз кхьизва
Мукьвара зи уьмуьрдин юлдаш, алим, хейлин йисара ДГУ-дин прикладной математикадин кафедрадиз регьбервал гайи илимрин доктор Мегьамед-Шафи Агьмедович Назаралиев алукьна, адан ютурдин кIараб хана. Чун гьасятда духтуррин суракьда гьатна ва, энгел тавуна, Махачкъалада авай республикадин травматологиядин центрадиз фена. Белки, ина хъсан духтурарни ава жеди, амма чал гьалтай духтурри зи уьмуьрдин юлдашдиз куьмек жедай са серенжемни кьабулнач. Операция авун герек туш лагьана, жуьреба-жуьре рапаралди-дарманралди сагъар хъувун меслятна.
Чун абурун теклифрал рази хьанач. Чаз Дербент шегьердин кьилин духтурханада чи ватанэгьли, бине СтIал Сулейманан райондин Ичинрин хуьряй тир машгьур духтур-травматолог Аслан Бугьадинович Рустамова кIвалахзавайди чизвай. Ада ина травматологиядин отделенидиз регьбервал гузва. «Эгер куьне начагъди къе гъайитIа, пака за адаз операция ийида», — лагьана духтурди телефондай.
Яргъал вегьин тавуна, йифен вахтунда, махсус машин кьуна, чна Мегьамед-Шафи Агьмедович Дербентдин духтурханадив агакьарна. Аслан Бугьадиновича гьа лагьайвал авуна. Аллагьдин кьадардалди адан къизилдин гъилерикай, тежрибадикай чаз куьмек хьана: операция авуна, зи уьмуьрдин юлдаш тIал-квалдикай азадна, кIвачел ахкьалдар хъувуна.
Чи вири хизандин патай Аслан Бугьадиновичаз чна рикIин сидкьидай сагърай лугьузва. Гьам духтур, гьамни адетдин инсан хьиз, ам анжах тариф авуниз лайихлу я. Хъсан духтур гьалтун азарлуди патал еке бахт я. Аслан духтур гьалтна, чи бахтуни гъана. Къуй вичихъ чандин сагъвал, яргъи уьмуьр, кIвале хушбахтвал хьурай.
Играми газет кIелзавайбур! ЧIуру крар, дуьшуьшар садан кьилелни татурай. Амма уьмуьрда гьич виливни хуьн тавур крар жезва. Тахьуй гьахьтин кар, эгер квекай са низ ятIани травматологдин куьмек герек хьайитIа, чна Аслан Бугьадиновичан патав фин меслятзава. Къуй вири сагъ-саламат хьурай!
ЦIийиварз Назаралиева
