Са кьадар тIимиларнава
РФ-дин илимдин ва высший образованидин министерстводи гъалибчийриз вузрик экечIунин рекье кьезилвилер гузвай мектебра кIелзавай аялрин олимпиадайрин кьадар кьудан са паюнилай гзаф тIимиларнава. Гила, олимпиадайрин сиягьда дегишвилер турдалай кьулухъ, вузрик экечIунин месэла нубатдин сеферда жемиятдин веревирдер арадал гъидайдаз элкъведа. Икьван чIавалди авай 83 олимпиададин чкадал сиягьда гила анжах 60 ама.
РФ-дин Президентдин меслятчи Елена Ямпольскаядин гафаралди, и серенжемди вузриз кьабулдай цIинин кампаниядин вахтунда арадал атай четин месэла гьялиз куьмек гуда. РикIел хкин, ЕГЭ-да 300 балл къазанмишай выпускникривай, олимпиадайрин гъалибчийрин кьадар гзаф хьун себеб яз, вузрик экечIиз хьанач.
Гьа са вахтунда къейдзавайвал, Вирироссиядин мектебра кIелзавай аялрин олимпиадади (ВОШ), виликдай хьиз, вузрик имтигьанар галачиз экечIдай ихтияр гузва. 24 предметдай акъажунар кьиле тухузвай и олимпиадади гьар йисуз тахминан 3 агъзур школьникдиз, гьи рекьяй хьайитIани, вузрик имтигьанар галачиз экечIдай мумкинвал ачухзава.
Гьа са вахтунда Президентдин академиядин илимдин къуллугъчи Борис Илюхина малумарайвал, олимпиадайрин сиягь РФ-дин илимдин ва высший образованидин министерстводи тестикьарзавайди я ва олимпиадайрин нетижайрикай, вуздик экечIдайла, менфят къачун патал, выпускникди талукь тир тарсунай ЕГЭ-дай, гьич тахьайтIа, 75 балл къазанмишун ва идалди вичин гьазурлухвилин дережа тестикьарун лазим я.
«Эхиримжи йисара уьлкведин вузриз гьар йисуз тахминан 10 агъзур кас олимпиадайрин гъалибчияр ва шабагьрин сагьибар кьабулзава, гьа са вахтунда бюджетдин гьисабдай бакалавриатдин ва специалитетдин сад лагьай курсара вири уьлкведин майданда авайди анжах 360 агъзур чка я. Яни им гьатта 3 процентни туш», – гьисабзава пешекарди. Адан гафаралди, олимпиадайрин гъалибчияр гзаф хьунин месэла гьисабзавай кьван екеди туш, адахъ галаз алакъалу нубатсуз теспачавал анжах уьлкведин са шумуд вуздин 15-далай гзаф тушир рекьерай арадал къвезва. Б.Илюхина гьисабзавайвал, олимпиадайрин гъалибчияр кьезилвиликай магьрум авуни и гьерекатдиз чIуру патахъай таъсирда.
Санлай къачурла, лагьана кIанда хьи, вузрик экечIунин месэладик кутазвай гьихьтин хьайитIани дегишвилери, адет яз, агьалийрин гегьенш къатара веревирдер арадал гъизва.
Чи мухбир