С. Кириенко – Дагъустанда
17-августдиз Дагъустандиз РФ-дин Президентдин Администрациядин Руководителдин Сад лагьай заместитель Сергей Кириенко мугьман хьана.
Москвадай атанвай мугьманди сифте нубатда РД-дин Кьилин везифаяр вахтуналди тамамарзавай Фёдор Щукинахъ галаз санал хейлин йисара Дагъларин уьлкведиз регьбервал гайи Мегьамедали Мегьамедован гуьмбетдал цуьквер эцигна. Гуьгъуьнлай абур Дагъустандин халкьдин шаир Расул Гьамзатован гуьмбетдал фена, адан экуь къамат рикIел хкана. 18-августдин экуьнахъ абуру Махачкъалада Ватан азад авур аскердиз хкажнавай гуьмбетдал цуьквер эцигна. Идалай гуьгъуьниз Сергей Кириенкоди Фёдор Щукинахъ галаз кIвалахдин рекьяй гуьруьш кьиле тухвана.
Дагъустандин регьберди РФ-дин Президентдин Администрациядин векилдиз регион яшайишдин вири хилерай вилик тухун патал кьабулзавай серенжемрикай, кьилиз акъудзавай проектрикай, вилик акъвазнавай месэлайрикай ихтилатна. Гуьруьшдал гатфарихъ къвайи къати марфарин чIуру нетижаяр арадай акъудун патал кьиле тухвай кIвалахдикайни рахана. С. Кириенкоди и жигьетдай республикада кьабулай серенжемриз ва абурун нетижайриз еке къимет гана. Ф. Щукина къейд авурвал, зиянар хьайи муниципалитетра яшайишдин метлеб авай объектарни кIвалер эцигна саки акьалтIарнава.
Гуьруьшдилай кьулухъ Сергей Кириенкоди Гьукуматдин членрихъ галаз совещание кьиле тухвана. Адан сергьятра аваз, гьар са министерстводин, ведомстводин регьберди дагъустанвийрик къалабулух кутазвай месэлаяр гьялунин жигьетдай кьиле тухузвай кIвалахдикай суьгьбетна. Къейд авурвал, республика патал виридалайни кьилин месэла (иллаки Махачкъала шегьер патал) агьалияр дурумлудаказ энергиядалди таъминарун я.
Совещанидин сергьятра аваз къанундал амал тавуна тешкилзавай эцигунриз талукь месэлани веревирдна. Дагъустанда, санлай къачурла, ахьтин объектрин кьадар 2500-дав агакьзава, абурукай 910 гзаф гьавайрин яшайишдин кIвалер я.
Совещанидилай гуьгъуьниз Сергей Кириенкони Фёдор Щукин республикадин жегьилрин центрадиз фена ва ина уьмуьрдиз кечирмишзавай проектрихъ галаз таниш хьана. Дагъустандин регьбердин гафаралди, регионда волонтеррин гьерекат вилик тухуниз еке фикир гузва. Абуру чпин викIегьвални садвал, яд акьалтай чIавуз арадал атай гьалар къайдадик кухтадайла, къалурна. Саки 3000-дав агакьна волонтерри зиянар хьанвай вишералди инсанриз куьмекдин гъил яргъи авуна. С. Кириенкодини Ф. Щукина иллаки тафаватлу хьайи са жерге волонтеррив гьукуматдин шабагьар вахкана.
«Дагъустанди сада-садаз куьмек авунин жигьетдай вири Россиядиз чешне къалурна. Жуьреба-жуьре миллетрин, динрин, яшарин векилри сад хьана куьмекдихъ муьгьтеж гьар са инсандиз гъил яргъи авуна. И карда жемиятдин вири къатари иштиракна: гьукумдин органри, бизнесдин векилри, жемиятдин тешкилатри… Аферин квез!» – лагьана С. Кириенкоди волонтеррихъ галаз кьиле фейи гуьруьшдал.
19-августдиз Сергей Кириенко Фёдор Щукинахъ галаз санал «Защитники Отечества» госфондунин Дагъустанда авай филиалдизни фена. Абур иниз къвезвайбурухъ галаз рахана ва абуруз фондуни гузвай куьмекдин дережадиз къимет гана. Къейд ийин хьи, СВО-дин иштиракчийриз, ветеранриз, абурун хизанриз талукь яз кьиле тухузвай кIвалах алай вахтунда гьукумдин вири органар патал кар алайбурукай сад я.
Филиал арадал гъайи 3 йисан къене иниз, куьмек герек яз, СВО-дин 9000-далай гзаф иштиракчиярни абурун хизанрин векилар атана. Центрадив агакьнавай 25 агъзурдалай гзаф арзайра къалурнавай месэлайрин 96 процент тамамдиз гьялнава. Ф. Щукина къейд авурвал, республикада СВО-дин иштиракчийрин, абурун хизанрин гьакъиндай къайгъударвал авун важиблу месэла яз амукьзава ва Ватан хуьзвай гьар са касдив вич тек туширди гьиссиз тазва.
Сергей Кириенко Дагъустанда хьайи мярекатрин арада «Доблесть гор» программадин иштиракчийрихъ галаз кьиле фейи гуьруьшни авай. Адани Фёдор Щукина и программадин сергьятра аваз чирвилер къачунвай СВО-дин 35 иштиракчидивни ветерандив абурухъ пешекарвилин гьазурвал авайди тестикьарзавай дипломар вахкана. Лагьана кIанда, ихьтин проект кардик кутунин тапшуругъ РФ-дин Президент Владимир Путина ганай. Дагъустан и программа кьилиз акъуднавай сифтегьан регионрикай сад я.
Гегьеншдиз РД-дин Кьилин сайтдай кIелиз жеда.
Агьмед Магьмудов