Вичин ери-бине Мегьарамдхуьруьн райондин Бут-Къазмайрилай тир жаван спортсмен Алихан Гьасанова Каспийскда кьиле фейи спортдин серенжемда турникдал санлай 53 сеферда чене акъудунай Россиядин рекорд эцигнава. Аферин вичиз! Им неинки жавандин, адан багърийрин, гьакIни санлай чи халкьдин руьгь хкажзавай шадвал я.

Вичин 7 йис тир Алихан Гьасанова алай гатуз Каспийскда хизандихъ галаз ял язавай. Ина абурун кIвал ава. Буба военный тирвиляй, алай вахтунда абур Эрменистандин Армавирда яшамиш жезва. Кьуд йис тамам хьайила, Алихан каратэдал машгъул жез башламишна. Кьве сеферда адакай спортдин и жуьредай Эрменистандин кIвенкIвечивал патал акъажунрин гъалибчини хьана. Гуьгъуьнлай ам турникдал тренировкайрал ва куьчедин воркаутдал машгъул жез эгечIна.

Алихана суьгьбетзавайвал, спорт ам патал неинки акъажунар, тренировкаяр ва гъалибвилер, гьакI гьар юкъуз вичел кIвалахун, къилих лигимарун, къуват артухарун, четинвилериз дурум гуз чир хьун, вилик макьсад эцигна, адахъ ялун я. Алай вахтунда ада 2-классда агалкьунралди кIелзава. Абурун хизанда пуд аял чIехи жезва. Амни Самира кьветхверар я. ЧIехи вах Амината 5-классда кIелзава.

Жаван рекордсменди диде-бубади аялдин рикI алай кардин тереф хуьнихъ, куьмекунихъ, руьгь кутунихъ еке къуват авайди къейдзава. Гьа са вахтунда аялди зегьмет чIугунал  рикI хьун лазим тирдини алава хъийизва. ГъвечIизамаз Россиядин рекордрин ктабда гьатун ада винидихъ къейднавай вири ерийриз жаваб гуз алакьунин нетижа яз гьисабзава. Дугъриданни, гъвечIи спортсмендин чIехи агалкьуни спортдин рекье мягькем камар аял чIавалайни къачуз жедайди субутзава.

Алиханан вилик цIийи макьсадар, тренировкаяр ква. Абуру цIийи рекордар эцигуниз куьмекдайдахъ чун кIевелай инанмиш я.

Рагнеда  Рамалданова