Мукьвара “Сулейман-Стальский район” муниципальный районда кардик квай терроризмдиз акси комиссияди 2017-йисуз тухвай кIвалахдин нетижаяр кьуна. Заседанида райондин администрациядин, идарайрин ва карханайрин векилри, АТК-дин членри, хуьрерин кьилери иштиракна.
Мярекат терроризмдиз акси комиссиядин председатель Нариман Абдулмуталибова ачухна ва кьилени тухвана.
Алатай йисуз комиссияди тухвай кIвалахдикай общественный хатасузвал хуьнин рекьяй райондин администрациядин кьилин заместитель, АТК-дин секретарь АбутIалиб Фатулаева гьахъ-гьисаб авуна. Ада лагьайвал, 2017-йисуз районда бандитвилин, терроризмдин, залукар кьунин дуьшуьшар хьанач.
— Гьахъ-гьисабдин девирда терроризмдиз акси комиссиядин 7 заседание кьиле тухвана, правовой 27 акт кьабулна, — давамарна А.Фатулаева. — Районда терроризмдиз ва экстремизмдиз акси тайин метлебдин муниципальный программа уьмуьрдиз кечирмишзава, соцкультбытдин объектар ва инсанар кIватI жезвай чкаяр ахтармишдай ведомствойрин уртах комиссияди кIвалахзава. И объектрик культурадин, здравоохраненидин, образованидин, яшайишдин, диндин дараматар акатзава. Абурукай 70 процентдихъ хатасузвилин паспортар ава.
Райондин официальный интернет-сайтда “Антитеррор” раздел кардик ква, аниз экстремизмдиз идеологиядин рекьяй акси тир шикилрин, видео ва маса материалар гузва. Чкадин телевиденидин каналрай РФ-дин ФСБ-ди ва НАК-ди, “Наука и просвещение против террора” сайтди меслят къалурнавай видеофильмаяр, роликар къалурзава.
— Акьалтзавай несил ватанпересвилин руьгьдаллаз тербияламишунин карда райондин образованидин управлениди, спортдин, туризмдин ва жегьилрин крарин рекьяй комитетди, дявединни зегьметдин, агъсакъалрин ва имамрин советри, жегьилрин парламентдини еке кIвалах тухузва, — давамарна АбутIалиб Фатулаева. — Районда тухузвай серенжемра, конкурсра, спортдин акъажунра ва маса мярекатра жегьилри активвилелди иштиракзава.
Заседанидал гьялзавай месэладай чпин фикирар ва теклифар гваз райондин прокурор Фархад Акимов, райондин Общественный палатадин председатель Алимет Мейланов рахана, алатай йисуз АТК-ди тухвай кIвалахдиз рази жедай къимет гана. Абуру къейд авурвал, 2017-йисуз районда умуми тахсиркарвилерин кьадар 40 процентдин тIимил хьана. Им терроризмдиз акси яз чкадин вичи-вич идара ийидай управленидин, къайдаяр хуьдай органри, общественный тешкилатри саналди дуьз кIвалах тухунин нетижа я.
Районда кардик квай терроризмдиз акси комиссияди гьахъ-гьисабдин девирда тухвай кIвалахдиз рази жедай къимет гайидалай гуьгъуьниз, 2018-йисуз АТК-ди тухудай кIвалахдин план тестикьарна.
Заседанидин нетижаяр муниципальный райондин кьил Нариман Абдулмуталибова кьуна. Ада къейд авурвал, общественный хатасузвал ва яшайишдин жигьетдай метлеб авай объектар хуьнин месэладив гьар са кас жавабдарвал гьисс авуналди эгечIун лазим я. Идалай неинки инсанрин хатасузвал, гьакIни пакадин югъ, гележегни аслу я. Гьавиляй хуьрерин поселенийра халкьдин арада тухузвай кIвалах мадни гужлу авун, и карда неинки къайдаяр хуьдай органрикай, гьакIни общественностдикай даях кьун чарасуз я.
Хазран Кьасумов
