Санкцийрин шартIара уьлкведин экономика  дурумлудаказ вилик  фин таъминарун патал Дагъустанда мекерайрин марафон башламишнава.

РД-дин хуьруьн майишатдин ва недай суьрсетдин  министерстводин куьмекдалди хуьруьн майишатдин  мекера и йикъара СтIал Сулейманан райондин администрацияди тешкилна. Мекерадин  павильонар  ва дезгеяр алатай киш юкъуз Кьасумхуьруьн кьилин майдандал ачухна.

Хсуси производстводин суьрсет мекерадал  СтIал Сулейманан, гьакIни Ахцегь, Кьурагь, Леваша, Мегьарамдхуьруьн районрин 20-далай артух хуьруьн майишатдин карханайри, лежбервилинни фермервилин, гьакIни хсуси куьмекдин майишатри гъанвай.

Кьасумхуьруьн ва райондин агьалийриз ина якIунни некIедин суьрсет, гьакIни майваяр, емишар, консервияр, гъуьр, чIахар, вирт ва райондинни республикадин мулкунал гьасилзавай маса шейэр базардин къиметрилай 10-15 процентдин ужуздаказ маса къачудай мумкинвал хьана.

Фермервилин суьрсет маса гунал машгъул “Муг” карханади, месела, хсуси производстводин са шумуд жуьре нисияр, хуьруьн майишатдин цIийи “АлиЯк” карханади нек ва гъери муьштерийрин вилик майдандиз акъуд­на. Райондин карханайри гьасилзавай ерилу суьрсет тахминан сад-кьве сятдин къе­не къа­чуна куьтягьна.

Мекерадиз  СтIал Сулейманан райондин кьил Нариман Абдулмуталибов, адан сад ла­гьай заместитель Лацис Оружев, УСХиП-дин  ва маса къурулушрин векилар мугьман хьана.­

Райондин кьили алишверишдин саки ви­ри дезгеяр ахтармишайдалай кьулухъ мярекат тешкилнавай дережа винизди тирди къейдна. Ада муьштерийрихъ ва шей ма­са гузвайбурухъ галаз ихтилатарна, абурун къиметар хабар кьуна, инсанрин гуьгьуь­лар гьихьтинбур ятIа, абурухъ четин месэла­яр авани, авачни  чирна, районда “мекерайрин” культура еримлу авунин гьакъиндай абурун теклифрихъ яб акална.

ИкI, санлай ва кура-кура техил, чIахар, гъуьр, шекер ва маса шейэр маса гудай “Лидер” центрадин кьиле авай касди пак рамазандин вацран вахтунда карханади метягь винел ви­чин кьил эхциг тавуна маса гудайдакай малумарна. “Къуй Аллагьди и пак вацра куьне авунвай хъсан вири крар кьабулрай ва сувабар са шумуд сеферда зарб авурай”, — малумарна  Н.Абдулмуталибова, адаз чухсагъул лугьуналди.

Муьштерийрин ва хуьруьн майишатдин суьрсет гьасилзавайбурун теклифар фикирда кьуналди, райондин руководстводин къарардалди недай суьрсетдин мекераяр муни­ципалитетдин мулкунал мукьвал-мукьвал тухудайвал я. Ида неинки чкадин суьрсет гьа­силзавайбуруз куьмек гуда, гьакIни райондин­ агьалияр ерилу, михьи суьрсетдалди таъминарда ва хкаж жезвай къиметрин вилик пад кьуник пай кутада.

«Лезги газет»