И йикъара Махачкъалада, Къумукьрин А.-П. Салаватован тIварунихъ галай госмуздрамтеатрда, Дагъустандин Халкьдин Собранидин Председатель Заур Аскендерова тереф хуьналди, «Живи и дари жизнь другим» мергьяматлувилин фондуни, «кьетIен аялриз» бахшна, мергьяматлувилин концерт гана. Адан макьсад кIевиз азарлу, бедендин мумкинвилер сергьятламиш хьанвай аялрин тIал алай месэлайрал жемиятдин фикир желб авун, куьмек гун, абурун гуьгьуьл къачун, ихьтин аялрин арадай бажарагълубур майдандиз акъудун тир.
Театрдин фойеда «Мирадж» центрада чпин устадвал хкажзавай инвалид аялри гъилелди чIугунвай шикилрин выставкани ачухнавай. Заур Аскендеров адаз тамашна, гьакIни махарай шикилар чIугунал машгъул жезвай Арсен Гьасановахъ галаз мукьувай таниш хьана. Ам, вичин сагъсузвилизни килиг тавуна, бажарагъ ачухариз чалишмиш жезвай жегьилрикай сад я. И карни адалай хъсандиз кьилиз акъудиз алакьзавайди яратмишунри тестикьарзава.
Дагъустандин парламентдин спикерди мергьяматлувилин ихьтин мярекатрихъ еке метлеб авайди, абуру Дагъустандин халкь кIеве авайбуруз куьмек гуз гьамиша гьазур тирди субутзавайди къейдна.
— КьетIен аялриз куьмек гун чи виридан, чарадан тIалдикай хабар кьадай гьар са касдин везифайрик акатзава. Абуруз яшайиш кьиле тухуз регьят туш, саки виридан уьмуьр чIехибурулай аслу я. Чи республикада бедендин мумкинвилер сергьятламиш хьанвай инсанрин месэлаяр кьетIен гуьзчивилик ква. Депутатриз за республикадин реабилитациядин центрайриз къаюмвал авунин тапшуругъ ганва. Ида центрайрин инфраструктура хъсанариз куьмекда. 2024-йисуз Россиядин реабилитациядин центрайриз чна 200 аял рекье туна. Гьа икьванбурув реабилитациядин сертификар вугана. 2025-йисан эхирдалди уьлкведин центрайриз 400 аял рекье тун пландик ква, — раижна Заур Аскендерова.
Концерт башламишдалди вилик кIватI хьанвайбуруз чIехи экрандилай «Живи и дари жизнь другим» мергьяматлувилин фондунин кIвалахдикай фильм къалурна. Къейд ийиз кIанзава хьи, 2012-йисалай кардик квай ада алатнавай йисара 50 агъзурдалай виниз аялриз (гзаф вахтара багьа дарманар, тадаракар маса къачуз, операцияр, реабилитация кьиле тухуз) куьмекар ганва. Аялрин чIехи пай онкологиядин, генетикадин, рикIинни дамаррин азарар, аутизм, дцп авайбур тир.
Фондуни Вирироссиядин «Мы вместе», «Прямая линия Президента», «Вам, родные» мергьяматлувилин ва маса серенжемра иштиракзава. Ам арадал гъайи духтур, Дагъустандин Халкьдин Собранидин Председателдин советник Лейла Керимовади фондуниз куьмекар гузвай, пулдин такьатар чара ийизвай ксарин кьадар хьиз, куьмек агакьзавай аялрин кьадарни йисалай-суз артух жезвайди къейдна. Гьа са вахтунда, эхиримжи йисара начагъ аялрин кьадарни тIимил туширдал гьайиф чIугунивди, фикир желбна.
Мергьяматлувилин концерт гуналди, Дагъустандин эстрададин гъетери къазанмишай, гьакIни мярекатдиз атай саки вири ксари гайи пулни фондуниз рекье туна.
Чи мухбир
