И йикъара Советрин Союздин Игит Абас Исрафилован тlварунихъ Мегьарамдхуьруьн галай 1-нумрадин ДЮСШ-да 2001-2002-йисара дидедиз хьайи жегьилрин арада райондин кlвенкlвечивал патал азаддиз кьуршахар кьунай акъажунар кьиле фена. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.
Спортдин мярекат муниципальный райондин спортдин отделди ва образованидин управлениди санал тешкилна.
Акъажунрин макьсад районда азаддаказ кьуршахар кьунин жуьре машгьур авун, спортдин жигьетдай жегьилрин устадвал хкажун ва сагълам уьмуьр таблигъ авун я.
Жегьил спортсменри чпин къуватарни алакьунар къалурна. Гъалибчияр ва хъсан чкаяр кьурбур грамотайралди къейдна.
«Лезги газет»
