Дагъустандин районрин арада спорт вилик тухунин кlвалахар лап хъсандаказ тешкилунай Республикадин смотр-конкурсдин нетижайра Мегьарамдхуьруьн район РД-дин физический культурадин ва спортдин министерстводин II дережадин Кубокдалди къейдна, — и гьакъиндай «Лезги газетдиз» Мегьарамдхуьруьн райондин пресс-къуллугъди хабар гузва.

Мукьвара Махачкъалада кьиле фейи РД-дин Минспортдин коллегиядин гегьенш заседанидал 2017-йисан нетижаяр кьуна ва смотр-конкурсдин гъалибчиярни приздин сагьибар малумарна.

Район махсус Кубокдалди къейд авунилай гъейри, физический культурадин ва спортдин отделдин директор Мирзегьасан Агъамирзоеваз, ГТО-дин тестированидин центрдин регьбер, Советрин Союздин Игит Абас Исрафилован тlварунихъ галай 1-нумрадин МДЮСШ-дин директордин заместитель Марат Гьажиевазни шабагьар гана.

Мегьарамдхуьруьн райондин кьиле авайбуру спорт вилик тухуниз кьетlен фикир гузва. И гьакъиндай райондин сергьятра гьар йисуз кьиле физвай жуьреба-жуьре акъажунри, мярекатри шагьидвалзава.

Куругъли Ферзалиев