Каспийскда Али Алиеван тIварунихъ галай спортдин ва жегьилрин комплексда Мегьамед-Салам Умаханован экуь къаматдиз бахшна боксдай международный нубатдин турнир кьиле фена. Ам ачухунин шад мярекатда Дагъустандин кьилин везифаяр вахтуналди тамамарзавай Владимир Васильевани иштиракна.
ЦIи турнирда 16 уьлкведай атанвай 140 пагьливанди иштиракна.
Турнирдин гьуьрметлу мугьманрин жергеда РФ-дин Федеральный Собранидин Председателдин заместитель Ильяс Умаханов, Эрменистандин Олимпиададин комитетдин сад лагьай вице-президент, АIВА-дин супервайзер, турнирдин технический делегат Дареник Габриэлян, РФ-дин спортдин федерациядин генсекретардин куьмекчи Агьмедхан Адилов, РФ-дин боксдин федерациядин гьуьрметлу президент Владимир Иванченко ва масабур авай.
Акъажунрин нетижайриз талукь делилар чна газетдин нубатдин нумарада гуда.
Международный и турнирда иштиракиз Дагъустандиз гзаф мугьманар атанвай. Турнир кьиле физвай йикъара шегьерда къати марф къвазвай. Итижлуди, марф акатайла Индиядай атанвай тумаждин бегьледин устадар кьуьлуьник экечIна. Спортсменрин, тамашачийрин, шегьерэгьлийрин фикир и агьвалатди вичел желбна.
Чи мухбир
