Мукьвара уьлкведин гзаф пипIера яшамиш жезвай смугъулвияр спортдин чIехи кукIушар муьтIуьгъарзавай Марат Абукаеван нубатдин гъалибвили мадни шадарна. Къейд ийин, Ахцегь районда яшайишдин гьалар хъсанарун патал вичин пай кутазвай, алай вахтунда вичин хайи Смугъулрин хуьре футболдал рикI алайбуруз савкьат яз тупунал къугъвадай майдан эцигзавай Али Шамилован хтул, спортдин мастер Марата спортдай вичин алакьунриз фикир гуз тазва ва халис дагъвидин рикI авай лезги хци вичин вилик эцигнавай мурадар — кукIушар муьтIуьгъарзава.
Марат Абукаев са шумуд сеферда армейский къайдада гъилералди кукIунай, панкратиондай, кудодай Дагъустан Республикадин турниррин гъалибчи, какахьай единоборствойрай дуьньядин Кубокдин сагьиб, Россиядин чемпион я.
Мукьвара Москвада Fight family promotion 3 лишандик кваз международный дережадин пешекарвилин турнир кьиле фена. Ина Россиядай, Азербайжандай, Албаниядай, Гуржистандай, Къазахстандай, Эрменистандай, Таджикистандай тир гзаф пагьливанри иштиракна. Абурун арада дуьньядин турниррин кIвен-кIвечияр, призёрар авай.
Марата 77 кг заланвилин категориядай бягьс Азербайжан Республикадай тир Рафигли Арзуманахъ галаз тухвана. М.Абукаева ам сад лагьай раундда технический нокаутдиз ракъурна. И гъалибвилел Маратан ярар-дустари, гьелбетда, багърийри ва тренерри лайихлудаказ дамахзава.
Марат Абукаева вичин алакьунар неинки спортдин рекьяй, гьакI Даггостехуниверситетдани къалурзава. 1999-йисуз дидедиз хьанвай ада спортдин гзаф жуьрейрай вердишвилер къачузва. Малум тирвал, ам грепплингдал, какахьай единоборствойрал, панкратиондал, универсальный бягьсерал, гъилералди кукIунал машгъул жезва ва адан киседа вири и жуьрейрай къазанмишнавай гъалибвилерин шагьидар — кубокарни медалар, грамотаяр ава.
Вахъ мадни еке агалкьунар хьурай, Марат!
Дагъви Шериф
