1-мартдиз ДГПУ-дин филологиядин факультетдин деканатда «Лезги чlал: саламатдиз хуьн ва еримлу авун» форумдиз гьазур хьуниз талукьарнавай тешкиллувилин комитетдин заседание кьиле фена. Тlвар кьунвай мярекат Яран суварин вилик, 20-мартдин Лезги чlалан суварин юкъуз, кьиле тухудай фикир ава.

Заседанидин кlвалахда Руслан Къадимова, Шайдабег Мирзоева, Фейзудин Нагъиева, Руслан Гереева, Мегьамед Ибрагьимова, Альбина Крымовади ва масабуру иштиракна.

Вичин кlвалахда гзаф кьадар мугьманри, чиновникри, мектебрин директорри ва хейлин масабуру иштирак авур, алатай йисуз кьиле фейи мярекатдилай тафаватлу яз, цlинин йисуз лезги чlал хуьниз талукьарнавай мярекат жуван хайи чlалал кьиле фида. Мярекатдиз Кьиблепатан Дагъустандин районрин, жемиятдинни образованидин тешкилатрин векилриз, хайи чlалан муаллимриз, милли газетрин, журналрин, радиодин ва телевиденидин къуллугъчийриз теклифда.

Заседанидал малум хьайивал, кьиле фидай форумдал лезги чlалан меэлайрай докладар кlелда ва лезги чlал хуьниз ва еримлу авуниз талукьарнавай месэлаяр веревирдда.

Тешкиллувилин комитетди форум жедалди мад са заседание кьиле тухун кьетlнава. Нубатдин сефердани тешкиллувилин комитет 15-мартдиз ДГПУ-дин филфакдин деканатда кlватl жеда.

Форумда иштиракиз ва чпин фикирар лугьуз кlанибурувай агъадихъ галай электронный адресдиз арзаяр ракъуриз жеда: Lirikamag@yandex.ru

Куругъли Ферзалиев