И мукьвара Мегьарамдхуьруьн А.И. Исрафилован тIварунихъ галай спортдин дараматда дзюдодай Кубок патал жаванрин арада республикадин турнир кьиле тухвана. Къейд авун лазим я хьи, мергьяматлувилин «Леки» фондуни тешкилзавай и акъажунар цIи Дагъустандин спортдин ва физический культурадин министерстводин календардин пландик кутунвай. Акъажунра республикадин жуьреба-жуьре пипIерай тир 200-далай виниз жаванри яшарин кьве (2011-2012 ва 2013-2014-йисара дидедиз хьанвайбурун арада) ва заланвилин са шумуд категориядай чпин устадвал къалурна. Кьилди къачуртIа, ана Махачкъала ва Дербент шегьеррин, Мегьарамдхуьруьн, Хив, СтIал Сулейманан, Агъул, Къайтагъ, Дербент районрин спортшколайра вердишвилер къачузвай спортсменри иштиракна.
Вичин макьсад Кьиблепатан Дагъустанда дзюдо машгьурун ва вилик тухун, спортдин и жуьредал машгъул жезвайбурун тежриба хкажун ва спортсменрин арада дуствилин алакъаяр мягькемарун, жаванар сагълам уьмуьр кечирмишунал желб авун тир спортдин и серенжем вини дережада аваз кьиле фена. «Леки» фондуни ам кьиле тухун патал куьмекар гунай вири спонсорриз – Мегьарамдхуьруьн райондин администрациядиз, Дагъустандин дзюдодин федерациядиз, «Самур» СШОР-диз (Олимпиададин резервдин спортшколадиз) ва Вирироссиядин категориядин судья Амирметов Мубарис Мегьманович кьиле аваз судьяйрин коллегиядиз, тамашачийриз яргъалди рикIел аламукьдай легьзеяр багъишунай тренерриз, спортсменриз, гьакIни амадагриз, активистриз, волонтёрриз, информациядин жигьетдай куьмек гунай «Лезги газетдиз» ва ФЛНКА-диз сагърай лугьузва. Турнир гьар йисуз кьиле тухуник кIевелай умуд кутунва.
Турнирдин тешкилатчийрин шартIарал амал авун яз, гьар са спортшколадай заланвилин са категориядай са аялди иштиракна кIанзавай. Гьавиляй тренерар виридалайни викIегь спортсменар рекье тваз алахънавай. Иштиракчийрин арада республикадин, Вирироссиядин, международный турниррин гъалибчияр гзаф авай. Итижлудаказ ва къизгъиндаказ кьиле фейи бягьсерин нетижада гъалибчиярни майдандиз акъатна. Мегьарамдхуьруьн райондин команда 1-чкадиз лайихлу хьана. Адаз «Лекидин» Кубок – чемпионвилин чIул, 5000 манат, къизилдин медаль, турнирдин эмблема алай футболка гана. Дербентдин командади – 2 ва Махачкъаладин командади 3-чкаяр кьуна. Абурни, талукь тирвал, 4000 ва 3000 манатдин пишкешриз, гимишдин ва буьруьнждин медалриз, рикIел аламукьдай пишкешриз лайихлу хьана.
Судьяйрин коллегиядин къарардалди махсус кубокарни тайинарнавай. ИкI, «За волю к победе» Кубокдиз Осман Абасов (Мегьарамдхуьр, 2011-2012-йисара дидедиз хьайибурун арада) ва Нурмегьамед Халилов (Дербент, 2013-2014-йисара дидедиз хьайибурун арада), «За лучший бросок» Кубокдиз — Арзуман Нежведилов (Мегьарамдхуьруьн район, 2011-2012-йисара дидедиз хьайибурун арада) ва Шарапутдин Манапов (Махачкъала, 2013-2014-йисара дидедиз хьайибурун арада) лайихлу хьана.
Тафаватлу хьайи командайрив, гьакIни абурун тренеррив шабагьар (гъалиб хьайи аялрин тренерриз гьар садаз 3000 манат гана) вахкуниз талукьарнавай мярекатдилай кьулухъ, хъсан адетдиз элкъвенвайвал, вири – спортсменар, судьяяр, тренерар ва болельщикар — са суфрадихъ кIватI хьана, чкадин ашпазри гьазурнавай атирлу аш ва маса няметар дадмишна.
Рагнеда Рамалданова
