И мукьвара Кьурагьа спортдин милли жуьрейрай “Кьурагьрин къугъунар” лишандик кваз акъажунар кьиле фена. Пуд лагьай сеферда тешкилзавай и турнир общественный деятель Гьажимурад Бабаеван экуь къаматдиз бахшнава. Акъа­жунар спортдин ирид жуьредай кьиле фена: чIемерукрай ягъун, къван гадарун, кросс-зверун, турникдал хкаж хьун, халкьдин жуьреда жим, путар хкажун, цIил ялун. Спортдин и мярекатда Сулейман-Стальский ва­ Кьурагь районрин жегьилри иштиракна. Сан­лай иштиракчийрин кьадар 150 касдилай гзаф тир.

Турнир ачухдай чIавуз Кьурагь райондин кьилин заместитель Махач Хариева къейд авурвал, ихьтин мярекатри пагьливанрин, къунши районрин, жемятрин арада дуствилин алакъаяр мягькемарзава.

Кьурагь райондин администрациядин физкультурадин, спортдин ва жегьилрин крарин рекьяй отделдин начальник Рамиз Рамазанова турнирдин иштиракчияр тебрик­на ва адан кьилин макьсад жегьил­рин арада­ дуствал хуьн, мягькемарун тирди къейдна.

Кьиблепатан Дагъустанда РД-дин Муфтиятдин марифатдин отделдин руководитель Шамил Омарова спортдин ихьтин мярекатар кьиле тухун диндани хъсан кар яз гьисабзавайдакай лагьана.

Гьажимурад Бабаеван хва Заура вири иштиракчийриз, мярекат кьиле тухуз куьмекар гайибуруз вичин буба рикIел хку­нин и турнирдиз атунай чухсагъул малумарна­.

Акъажунрин призрин фонд 200 агъзур манатдиз барабар тир. Командайрин арада сад лагьай чка Кьурагьри кьуна. И команда спортдин ирид жуьредикай кьуд жуьредай гъалиб хьана­.

Приздин чкаяр кьурбуруз, талукь тирвал, 5,4,3 агъзур манатдин пулдин премияр, медалар, грамотаяр, рикIел аламукьдай пишкешар гана.

Турнирдин спонсор Мегьамедзагьир Гьабибуллаева вири гъалибчийриз телефонар багъишна.

ЦIил ялунай кIвенкIвечи чкаяр кьурбуруз 12, 9, 6 агъзур манат премияр гана. Мярекатдин эхирдай вирида рикIел аламукьдай шикил яна.

Шагь Шагьов