18-декабрдиз РД-дин Кьил Владимир Васильева Махачкъалада, Тарихдин паркуна, кьиле фейи “Вун — карчи” конгрессдин нетижаяр кьуниз талукьарнавай мярекатда иштиракна. Идакай “Лезги газетдиз” Дагъустандин Кьилин ва Гьукуматдин Администрациядин пресс-къуллугъди хабар гана.
Музейдинни выставкайрин комплексдин фойеда тешкилнавай конгрессдин иштиракчийрин бизнес-проектрин ва теклифрин махсус выставкадихъ галаз таниш хьайидалай кьулухъ региондин Кьили къейд авурвал, проектрин авторар халис ватанпересар я, абуру Дагъустан адалай къецепатани машгьурзава.
“Заз и мярекатдиз атанвай иштиракчийризни министрриз чухсагъул малумариз кIанзава. Заз гележегдин Дагъустандиз ва ина экономика арадал гъиз гьазур тирбуруз килигун итижлу тир. И залда гьахьтин инсанар авайдахъ зун инанмиш я. Чун вирибур патал барабар конкуренциядин шартIар тешкилиз гьазур я”, — лагьана Владимир Васильева.
Мукьвара республикадин сергьятра авай АЗС-рин векилрихъ галаз кьиле фейи гуьруьш рикIел хкуналди, РД-дин Кьили давамарна: “Чна абурувай намуслудаказ налогар гун ва и хиле шумуд касди кIвалахзаватIа къалурун тIалабна. Идалай кьулухъ налогрин кьадар артух хьана. Бязи АЗС-ри гузвай налогрин кьадар лагьайтIа, 2-4 сеферда гзаф, кIвалахдай алава чкаяр пайда хьана. И делилди абуру халкьдин вилик жавабдарвал кьатIузвайди къалурна”.
Владимир Васильеван гафарай малум хьайивал, конгрессдал къалурнавай са проект республикадин руководстводи идара ийида. “И проект чун инал рахазвай вири месэлайрихъ галаз кьазвайди я. Гьа са вахтунда ам итижлу, эдеблу, мергьяматлувилин проектни я”, — къейдна Дагъустандин Кьили. Ихтилат мумкинвилер сергьятламиш хьанвай инсанар карчивилин куьмекдалди реабилитация авунин яшайишдин проектдикай физва.
“Чпин патав Гьукумат атун и жегьил инсанар патал лап важиблу я. Юлдашар, чун, гьам гафарал, гьамни крарал гьалтайла, сад хьана кIанда. Им чарасуз шартI я. Вучиз лагьайтIа, чи виридан макьсад умумиди я – халкьдиз къуллугъ авун. Им чIехи жавабдарвал тирди аннамишна кIанда”, — малумарна Владимир Васильева.
Мярекатдин сергьятра аваз РД-дин Гьукуматдин Председатель Артем Здуновни рахана:
“Играми дустар, квез аферин! Куьн санал ацукьнавач, кIвалахзава, виликди физва. Куьн республика патал важиблу проектар итижлудаказ къалуриз алахъзава. Дережадал гьалтайла, гьелбетда, абур гьар жуьрединбур я. Проектрин презентацийрин еридикай рахайтIа, зи фикирдалди, абур куьруьбур ва маналубур хьун герек я. Абурукай ихтилатдайла, фикир желбдай къайдада суьгьбетна кIанда. Им за гузвай меслят я, куьне и кардиз фикир це. Чун Дагъустанда карчивал вилик тухуниз куьмек гуз гьазур я…”, — лагьана республикадин премьер-министрди.
Конгрессдин эхирдай са жерге иштиракчийрив пишкешар вахкана.
Къейд ийин хьи, программада карчивилиз талукь проектар гьазурнавай 600-лай виниз дагъустанвийри иштиракна.
«Лезги газет»
