Дагъустанда гьукумдин кьиле тайинарнавай жавабдар ксари республикадин министерствойрани ведомствойра кадрийрин жигьетдай дегишвилер тун давамарзава.
ИкI, виликдай РД-дин информациядин ва печатдин Агентстводин регьбердин сад лагьай заместитель яз кIвалахай Рустам Жалакьов, и къуллугъдикай азадна, РД-дин Гьукуматдин Председателдин заместителдин везифаяр вахтуналди тамамарзавай Муслим Телякавован куьмекчи яз тайинарнава.
Инвестицийриз талукь сиясатдин, карчивилин тешкилатрихъ ва ассоциацийрихъ галаз алакъаяр хуьнин рекьяй РД-дин Гьукуматдин Председателдин куьмекчидин къуллугъ Абдуразакь Разакьовал ихтибарнава. Камал Галбацов лагьайтIа, РД-дин милли сиясатдин ва динрин крарин рекьяй министрдин заместителдин къуллугъдикай азаднава.
Къуллугъдикай азаднавайбурун арада РД-дин ветеринариядин рекьяй комитетдин председатель Мегьамед Шапиевни ава. Адан чкадал Тарумовский райондин ветуправленидин начальник Муслим Агьмедов тайинарнава.
ГьакIни РД-дин физический культурадин ва спортдин министрдихъни цIийи сад лагьай заместитель хьанва. РД-дин Гьукуматдин Председатель Мегьамед Рамазанован къарардалди и къуллугъ Заур Салаутдинован хиве тунва. Виликдай ада Махачкъалада авай Олимпиададин къугъунриз гьазурвилер аквадай центрадиз регьбервал гузвай.
Агьмед Магьмудов
