ЦIи Дагъустанда цIийи 20 мектебни аялрин 1 бахча ачухнава

Эхиримжи йисара Дагъустандин яша­йишдин жуьреба-жуьре хилера хьиз, образованидин къурулушдани хъсан патахъ дегишвилер кьиле физва. Кьилди къачуртIа, республикада эцигнавай ва цIийикIа туькIуьр хъувунвай­ мектебрин кьадардал гьалтайла, Да­гъустан уьлкведа кIвенкIвечи регион­ри­кай сад я. Образование дурумлу­ эко­номикадин, къулай яшайишдин, ви­ри рекьерай вилик финин бине тирди рес­публикадин Кьил Сергей Меликоваз хъсандиз чизва, гьавиляй ада и хел еримлу авуниз кьетIен фикирни гузва.

Алай йисуз республикадин муниципалитетра цIийи 20 мектебни аялрин 1 бахча ачухнава. Образованидин цIийи идараяр Махачкъала, Каспийск, Къизилюрт шегьерра, Къизилюрт, Табасаран, ЦIумада, Докъузпара, Кьурагь, Казбек, Ногъай, СтIал Сулейманан, Хасавюрт, Къарабудахкент, Мегьарамдхуьруьн ва Леваши районра кардик акатнава. Абур ачухуниз талукьарнавай мярекатра РД-дин Гьукуматдин Председатель Абдулмуслим Абдулмуслимова, адан заместителри, министрри, РД-дин Халкьдин Собранидин депутатри иштиракна.

Сергей Меликован тIварцIихъай Да­гъустандин муаллимриз ва аялриз Чирвилерин югъ Абдулмуслим Абдулмуслимова мубаракна ва эхиримжи йисара региондин образованидин хиле кьиле физвай дегишвилерикай суьгьбетна.

«И гуьлуьшан юкъуз чун вири рес­пуб­ликадин жуьреба-жуьре муниципалитетра цIийи мектебар ачухунин шагьидар я. Лагьана кIанда, эхиримжди йисара образованидин хиле къазанмишнавай агалкьунар милли проектар кьилиз акъудунин, месэлаяр гьялун патал бюджетдай чара авур пулдин такьатрин ва кьилинди — дагъустанвийрин, эцигунрин кIвалахра иштиракай устIарринни фялейрин гьакъисагъ зегьметдин нетижа я», — лагьана премьер-министрди.

Адан гафарай гьакIни малум хьайивал, са шумуд йисан къене Дагъустанда 370-далай виниз мектебар цIийикIа туькIуьр хъувуна, алай аямдин техникадалди, мебелдалди ва герек маса за­тIаралди таъминарна.

«РикIел хкин, 2021-йисан эвел кьилера Дагъустанда капитальнидаказ ремонт авуна кIанзавай мектебрин кьадар са агъзурдав агакьнавай. 2025-йисалай мектебар цIийикIа туькIуьр хъувун патал кардик кутур хьтин программа аялрин бахчайриз ва колледжриз талукь язни кьабулда. Къе республикадин мектебра гъвечIи классра кIелзавай аялриз (абурун кьадар, санлай къачурла, 200 агъзурдав агакьзава) йикъа са сеферда чими тIуьнар гузва. Къейд ийин хьи, мектебра гузвай хуьрекрин, суьрсетрин еридиз гуьзчивал тухузвай идарайри кьетIен фикир гузва», — алава хъувуна А.Абдулмуслимова.

Республикадин бязи мектебра хейлин йисара аялри пуд сменада кIелзавай. Мисал яз, 2021-2022-йисара ихьтин мектебрин кьадар 33-дав агакьнавай ва 3-сменада, санлай къачурла, саки 7 агъзур аялди чирвилер къачузвай. Алай вахтунда лагьайтIа, и месэла тамамдиз гьялна акьалтIарнава ва къенин юкъуз агъзурдалай виниз мектебра тарсар вад юкъуз тухузва. Азад яз амукьнавай сятер классдилай къеце кIвалахриз ва ЕГЭ-яр вахкузвай предметриз чара авунва.

Лезги районра ачухнавай мектебрикай куьруь малуматар гун. КIелдай 150 чка авай цIийи мектеб 2-сентябрдиз СтIал Сулейманан райондин Герейхано­ван хуьре ачухна. Кьве гьавадин дара­матда 13 класс, пищеблок, актовый ва спортдин залар, набутар патал махсус лифт ава. ЦIи и мектебда 135 аялди кIелдайвал я.

Мектеб ачухунин мярекатда РД-дин Гьукуматдин Председателдин заместитель Нариман Абдулмуталибова, РД-дин Халкьдин Собранидин депутат Имам Яралиева, муниципалитетдин кьил Саид Темирханова ва масабуру иштиракна.

Мегьарамдхуьруьн Самур хуьре цIийи мектеб фадлай вилив хуьзвай. Чирвилерин юкъуз хуьре цIийи мектеб ачухун чкадин агьалияр патал вижевай савкьат хьана. И вакъиадиз талукьарнавай мярекатда РД-дин Гьукуматдин Председателдин заместитель Рамазан Жафарова, РД-дин Халкьдин Собранидин депутат Мусафенди Велимурадова, Россиядин Федерациядин Игит Муслим Муслимова, Мегьарамдхуьруьн райондин кьил Фарид Агьмедова ва масабуру иштиракна.

Къейд ийин хьи, цIийи мектебда кIел­дай 504 чка ава. Пуд гьавадин дарамат кьуд корпусдикай ибарат я. Анра пищеблок, актовый, спортдин заларни ава.

Шадвилин мярекатдал,  акьалтзавай­ несилдин векилриз Чирвилерин йикъан сувар мубарак авуналди, Рамазан Жафарова абуруз ватанпересвилин чешне яз мукьвара Игитдин тIварцIиз лайих­лу хьанвай Муслим Муслимован ви­кIегь­вилерикай ихтилатна. Ада чи кьегьал ватанэгьлидиз багьа савкьатни пишкешна.

Кьурагь райондин Аладаш хуьрени цIийи мектеб ачухна. И вакъиадиз талукьарнавай мярекатда РД-дин МЧС-дин министр Нариман Къазимегьамедова, РД-дин Халкьдин Собранидин депутат Девлетхан Алиева, муниципалитетдин кьил Замир Азизова ва масабуру иштиракна.

Аладаш хуьруьн агьалийрини мектеб фадлай вилив хуьзвай. Эхирни, «Образование» милли проектдин сергьятра аваз, мектеб эцигна, ишлемишиз вахкана. Ана  кIелдай  216 чка ава.

Мад са мектеб Докъузпара райондин Авадан хуьрени ачухна. И вакъиадиз талукьарнавай мярекатда РД-дин энергетикадин ва тарифрин министр Марат Шихалиева, РД-дин Халкьдин Собранидин комитетдин председатель Фирудин Ражабова, муниципалитетдин кьил Мегьамед Шамилова ва масабуру иштиракна.

ЦIийи мектебда кIелдай 405 чка ава. «Развитие образования» госпрограммадин сергьятра аваз эцигнавай и мектебди аялри 3 сменада чирвилер къачунин месэла гьялиз куьмекна.

Амай муниципалитетра ачухнавай мектебрикай гегьеншдиз РД-дин Гьукуматдин сайтдай кIелиз жеда.

Агьмед  Магьмудов