14-мартдиз Махачкъалада РД-дин Гьукуматдин Председателдин заместитель Ризван Гъазимегьамедован регьбервилик кваз кьиле фейи совещанидал республикада игьтият патал хуьзвай недай-хъвадай суьрсетдиз талукь яз авай гьалар веревирдна.
“Чна сифте нубатда герек къвезвай метягьрин къиметар дурумлудаказ хуьн патал базарра арадал къвезвай гьалариз виликамаз къимет гана кIанзава”, — лагьана Р.Гъазимегьамедова совещание ачухдайла. Адан гафаралди, къиметар хкаж хьунин месэла муракабди я, агьалийрин къазанжияр тIимил жезвай шартIара и кардиз рехъ гана виже къведач.
Мярекатда иштиракай бязи карчийри къейд авурвал, гьакъисагъвал авачир, тупуналди маса гузвай бязи алверчийри чпин алишверишдин карханаяр агалнава, ихьтин шартIара кура-кура маса гузвай затIарин къиметар хкаж жезва. Мисал яз, шекердин къимет са гьафтедин къене юкьван гьисабдалди 8-10 манатдин багьа хьанва.
РД-дин промышленностдин ва алишверишдин министр Низам Халилова хабар гайивал, шекер Дагъустандиз асул гьисабдай Краснодардин крайда авай алишверишдин чIехи карханайри ахъайзава. Идалай гъейри, гречка, семечкайрин гъери ва са жерге маса суьрсетарни республикадиз паталай гъизва. Дуьгуь Бабаюрт ва Къизляр районра гьасилзава. Гъуьр Дагъустандин кеферпата авай районра Ставрополдин крайдай ва Ростовдин областдай гъизвай къуьлуькай ийизва, я тахьайтIа, и регионрикай санай маса къачузва.
Р.Гъазимегьамедова къейд авурвал, метягьрин къиметриз талукь месэла алай вахтунда уьлкведин гьуькуматдин дережада аваз веревирдзава. Ада республикадин талукь идарайриз базарра авай къиметар датIана гуьзчивилик кутунин тапшуругъ гана.
РД-дин хуьруьн майишатдин ва недай-хъвадай суьрсетдин министр Баттал Батталова хабар гайивал, республикадин муниципалитетриз чкайрал хуьруьн майишатдин мекераяр кьиле тухун теклифнава. Анра агьалийривай метягьар базардинбурулай ужуз къиметрай маса къачуз жеда.
Къейд ийин хьи, бязи суьрсетрин къиметар садлагьана хкаж хьунин себебрикай сад виликдай къецепатан уьлквейрай метягьар хкизвай рекьер агал хьун, маса регионрай къачузвай затIар чкадал хкуниз еке харжар акъатун я.
«Лезги газет»
