Чирвилерни ава, тежрибани хьанва
Гьуьрметлу “Лезги газет кIелзавайбур! “Къацу аптекади” вичин кIвалах давамарзава. Сифте нубатда чаз квез хъсан меслятар гуз кIанзава. Сад лагьайди, чна багъри газетдиз подписка ийиз агакь тавунвайбуруз и кар амай варцара хъувун теклифзава. Чи газетдай уьмуьрдин гьи хилез хьайитIани талукь месэлайрай жавабар жагъизва. “Къацу аптекади” квез азарар вучиз арадиз къвезватIа, абур жуван бедендай, жибиндиз зарар тагана, гьикI квадардатIа, гьадаз, яни сагъламвилиз талукь меслятар къалурда.
Чи дарманар чи патарив гва. Чна фагьум тагуз, я тахьайтIа, абурукай хабар авачиз, чин тийиз гьикьван менфятлу шейэр гадарзава. Месела, къачун чна гьар хуьрек гьазурдайла ишлемишзавай чичIекар. Хъуьруьшар гьиниз физва? Гьелбетда, гадарзава. Абуру простатит, аденома авайбуруз лап хъсан куьмекда. Кьилелай чIар алахьзавайбурузни. Вуч ийидатIа, чна гуьгъуьнин макъалайра гегьеншдаказ лугьуда.
Бананрин чкалар гьиниз физва? Гьабурун кьисметни гьахьтинди я. Гьабурукайни тIазвай юкьвариз, жалгъайриз ядай хъсан къаришмаяр гьазуриз жеда. Жезмай кьван куьлуь авуна, са банкадиз вегьена, винел акьалтдайвал эрекь цана, са гьафтеда мичIи ва чими чкада эциг, гьар юкъуз галтадна акадара. 7 йикъалай дарман гьазур я. ТIушуна юкьвар, жалгъаяр ва тIазвай маса чкаяр.
Бес кафтуфрин чкаларни гадарзавачни? Эхь! Абурукай юкьван тарцин грыжадиз акси хъсан къаришма гьазуриз жеда. ГьикI? Чкалар лап хъсандиз чуьхуьда. Ахпа хъсандиз ргада, са кIус къурна, куьзда. Пюре гьазурдайвал, рганвай чкалар акадарна хапIа хьтинди ийида. Гьадак 100 г вирт акадарда. Къаришма гьазур я. Вад сятда грыжадал эцигна тада. Алудайдалай кьулухъ, мазь эцигай чка чимиз хвена кIанда.
Уьзуьмрин цилер кIватIдайбурни чаз чиз тек-бир жеда. Абурукай гьазурнавай дарман чи дамарриз ва вилерин ишигъдиз таъсирзавай нервдиз еке куьмек я.
Буранар ишлемишдайла, абурухъ галай кьурай тумар атIана гадарзава. Абурукай авай хийир чир хьайила, квез аквада хьи, дарманар элкъвена чи патарив гва ва аптекадиз чукурун чарасуз туш.
Гьуьрметлу чи газет кIелзавай-бур! Чаз чирвилерни артух хьанва, сагъар хъувунин рекье еке тежрибани кIватIнава. Квевай куь месэлайриз талукь суалар чи редакциядизни рекье тваз жеда, я тахьайтIа, 8-909-483-57-20 нумрадиз зенг авуна, чавай хабар кьуртIани. И кардай чун кIусни инжиклу жедач. Чалай алакьдай куьмекар гуз чун гьазур я. Куьн гьамиша сагъ хьурай!
Башир Шихмурадов,
Теймур Гьабибов
