Россиядин МЧС-ди Дагъустандин дагълух районра арадал атанвай гьалар кьетIен гуьзчивилик кутунва. РикIел хкин, къати марфар къунин нетижада бязи дагълух районра исятдани чилер уьцIезвай, жуьреба-жуьре дараматар чкIизвай дуьшуьшар ава.
28-апрелдиз РД-дин Гьукуматдин Председатель Абдулмуслим Абдулмуслимов, СКФО-да Президентдин патай тамам ихтиярар ганвай векилдин заместитель Мегьамед Рамазанов ва РФ-дин МЧС-дин департаментдин директор Олег Мануйло Дахадаеван, Тлярата, Лак, Къули ва маса районриз фена, арадал атанвай гьаларихъ галаз чкадал таниш хьана.
Олег Мануйлодин гафаралди, чилер уьцIуьнин вири себебар тайинарун патал и месэла дериндай, тамамдиз ахтармишна кIанзава, гьикI лагьайтIа, исятдани бязи дагълух хуьрера чилер кIватунин хаталувал ама. Идалай гъейри, чкIанвай рекьер, муькъвер, яшайишдин кIвалер ва маса объектар цIийикIа туькIуьр хъувунин месэлани гьялна кIанзава. Вири месэлаяр веревирд авун патал оперштабдин заседание кьиле тухвана.
«Лезги газет»
