Дагъустанви пагьливан Хабиб Нурмегьамедов Махачкъалада журналистрихъ галаз гуьруьшмиш хьана. Мярекатрин сергьятра аваз ада гила вичихъ галаз экъечIдай Тони Фергюсонакай фикирар лагьана, вич Бишкекдиз фейидакай суьгьбетна ва журналистрин суалриз жавабар гана.
Мярекат РД-дин спортдин ва физический культурадин министерстводин конференц-залда кьиле фена. Иниз Хабибан буба ва тренер Абдулманап Нурмегьамедов, РД-дин спортдин министрдин сад лагьай заместитель Зайнал Салаутдинов, министрдин заместитель, Олимпиададин гъалибчи Гайдарбег Гайдарбегов, Олимпиададин чемпион Мансур Исаев ва гзаф масабур атанвай.
Гуьруьшдин сифте кьиляй Зайнал Салаутдинова Хабиб Нурмегьамедоваз РД-дин минспортдин Гьуьрметдин грамота гана ва къейдна хьи, и ведомстводин патай гьуьрметдин грамота адахъ гьеле авачир.
Журналистри Хабибаз гайи сифте суал, Интернетда чпикай ванер-сесер чкIанвай, кьве бягьсинилай (тIвар къазанмишун ва ам хуьн) кьулухъ вичи спортдин гурарай виниз хкаж хьун акъвазарзава, лугьузвай хабарриз талукьди хьана.
— Кьвед ва я пуд бягьсинилай кьулухъ зи пландик спортдин карьера акъвазарун квач. Сифте нубатда, 7-апрелдиз зи вилик чемпионвилин тIвар къазанмишунин бягьс ква. Ахпа са гьихьтин ятIани планар яда. Мад кьве йисуз заз жув анжах спортда аваз аквазва, — лагьана Х.Нурмегьамедова.
Къиргъизистандиз финикай ада къейдайвал, анин агьалийри ММА-диз еке итиж ийизва. “Абуруз спортдин и жуьре гзаф кIанда. Чи гадайрин, гьа жигьетдай дагъустанвийрин тереф хуьзва. Чун абуруз медениятдин ва диндин рекьяй мукьва я”.
Малум хьайивал, 10-февралдиз Хабиб Мадриддиз физва. Ина адаз Мадриддин “Реалдин” регьберри пачагьдин къугъуниз атун теклифнава. Анай пагьливан США-диз рекье гьатда ва чемпионвилин тIвар къачуз гьазурвилер аквада.
Тонидихъ галаз бягьсиниз гьазур хьуникай суаларни тIимил ганач.
— Зур йисан вахтунда инсан дибдай дегиш хьун мумкин я. Бязи бягьсера ада са гьихьтин ятIани гъалатIриз рехъ ганайтIа, къведай бягьсера, мумкин я, ада ахьтин гъалатIар хъийидач. Жуваз талукь яз лугьуз хьайитIа, за гьамиша вуч авунатIа, гьам ийида. Дибдай са затIни дегишардач. Бягьс гьамиша сад-садан къаршида акъвазунилай (стойкадилай) башламиш жезва, гьавиляй зун стойкадилай эгечIда, ахпа партердиз элкъуьрда. Бягьс жедалди 70 югъ ама, зун инанмиш я, вири хъсан жеда, — жаваб гана Хабиба.
Дагъустанви пагьливанди вичихъ галаз женгиниз экъечIдай Т.Фергюсонакай суьгьбетдал мадни алава хъувуна.
“Зайиф женгчийри UFC-да сад-садахъ галаз 10 бягьсина гъалибвал къачузвайди ва “вахтуналди чемпионвилин” чIулни къазанмишзавайди туш. Адахъ лап хъсан рикI ава, кьуьнтер хаталубур я, гьакIни Тониди партерда хъсан дурум гуда. Лугьудайвал, “чунни аюхар туш эхир” ва Фергюсоназ жуван бягьс теклифда”.
Пешекарри фикирзавайвал, чIул патал и бягьс 2018-йисуз UFC-да виридалайни итижлуди жеда.
“Зани гьа икI гьисабзава. UFС-дин вири тарихда чпихъ 9-10 гъалибвал авай пагьливанар сад-садахъ галаз гьич са сефердани акъуднавайди туш. За фикирзава, бягьс зарафатдинди жедач”, — алава хъувуна Хабиба.
UFC
