Са шумуд югъ идалай вилик Чечен рес­публикадин меркез Грозныйда азаддаказ кьуршахар кьунай жаванрин ва жегьилрин арада кьиле фейи рейтингдин 12-турнирда СКФО-дин регионрай тир 300-далай виниз спортсменри гьасиррал чпин устадвал къалурна. Вичин ери-бине СтIал Сулейманан райондин ЦIийихуьряй тир Абдурагьман Шидиева 55 кг-дин заланвал авабурун арада къизилдин медаль къазанмишна.

Малум хьайивал, машгьур тренер ва муаллим Минажудин Къазиеван гъилик устадвал хкажзавай чи ватанэгьлиди (сифтегьан тренер – Рашид Асалиев) спортдин гьасиррал 5 бягьс кьиле тухвана. Адаз чIул, медаль, грамота гана. 

И йикъара жаван пагьливан муниципалитетдин жегьилрин центрада шад гьалара кьабулна. Райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова адаз гъалибвал тебрикна, гележегда мадни еке агалкьунар хьун алхишна, тебрикдин грамота, гьакIни райондин меценатрин патай пулдин пишкеш гана.

Рагнеда Рамалданова