Донбассдин мулкар, шегьерар, хуьрер Украинадин миллетбазрикай азадзавай женгера иштиракзавайбурун гьа­къиндай государстводихъ галаз сад хьиз жемиятдин тешкилатри, мергьяматлувилин фондари, меценатри, гьакI кьилдин инсанрини къайгъударвал ийизва. Ахьтинбуру­кай сад государстводин «Ватан хуьзвайбур» фонд я. Алатнавай кIуьд йисан кIвалахдин нетижаяр кьурла, малум хьана хьи, фондуни жуьреба-жуьре рекьерай СВО-дин агъзурралди ветеранриз куьмекар гана.

ИкI, чеб кIвалахдалди таъминарунин гьакъиндай фондуниз СВО-дин 23 агъзур ветеранди арзаяр кхьена. Абурун чIехи пай чпин мураддив агакьна. 16400 ветерандиз цIийи ва я алава пешеяр къачудай игьтияж авай. Абурун 66 процент кIелдай чкайриз рекье туна. Офицеррини аскерри вузра, ссузра, махсус курсара кIелзава, чпин чирвилер артухарзава.

«Ватан хуьзвайбур» фондунин алахъунар себеб яз, СВО-дин 17 агъзур ветеран датIана спортдал машгъул жезва. Абурукай 4500 кас инвалидар я. Абуру чпиз гузвай мумкинвиликай гъавурда аваз ва ашкъидивди менфят къачузва. Лайихлу кар ам я хьи, Ватандин итижар хуьдайла инвалидар хьанвай аскерар руьгьдиз мягькембур я. Абуру спортда виле акьадай хьтин агалкьунарни къазанмишзава. 750 кас спортдин жуьреба-жуь­ре хилерай республикайрин, регионрин хкянавай командайрин членар я.

Дяведин махсус серенжемдин иштиракчийриз, ветеранриз куьмек гунин кардик РФ-дин оборонадин министерстводи, военно-социальный центради кутазвай пайни итижлуди я. «Ватан хуьзвайбур» фондуни чи кьегьалриз ислягь уьмуьрдив эхгечI хъувун патал гьар жуьредин мумкинвилер гузва.

Абад  Азадов