Рахунрин нетижаяр

США-дин президентдин махсус илчи Стив Уиткоффа, Россиядизни Украинадиз фейила, анрин векилрихъ галаз Украинадин къалмакъал къайдада тунин патахъай теклифар веревирд авурдакай малумарна. Идакай ислендиз «РИА Новости» чешмеди хабар гана.

«Махсус илчи Уиткофф, Жаред Кушнер ва милли хатасузвилин советдин, госдепартаментдин ва финансрин министерстводин векилар гьар са терефдихъ галаз теклифар веревирд авун патал Россиядин Президент Владимир Путинахъ ва…  Владимир Зеленскийдихъ галаз гуьруьшмиш хьана», – малумарна Уиткоффа «Х» соцсетда.

Кремлда абурухъ галаз Владимир Путина алатай киш юкъуз­ гуьруьш кьиле тухвана. Анал Россиядин регьберди Украинада къалмакъал хьунин эвелимжи себебар арадай акъудунин чарасузвал авайди кьетIендаказ къейдна. Президентдин гафар адан куьмекчи Юрий Ушакова журналистриз малумарна.

Ушакова гьакIни къейдна хьи, Россиядин терефди дяведин махсус серенжем кьиле физвай чкайра авай гьалариз гьакъи­къи къимет ганва, уьлкведин армиядин агалкьунарни къейднава. Уиткоффани Кушнера, Киевда чпи гуьруьш тухудайла, Владимир Путина гайи къиметдикай менфят къачун хиве кьуна.

Къейд ийин, Уиткофф ва Дональд Трампан езне Кушнер гьяд юкъуз къалмакъал къайдада тунин жигьетдай меслятар къалурун патал Киевдиз фена.

Аксивалунин фикирдилай элячIзавач

Вич кьиле авай христианско-демократический союздин (ХДС) дережадиз пис патахъай таъсирзаватIани, Германиядин канцлер Фридрих Мерца Россиядиз акси сиясат дегишардай ният авачирди малумарнава. Пресс-конференциядал ада лагьай гафар «Лента.ру» чешмеди раижнава.

«Исятда чна чи азадвал хуьн лазим тирдакай, гьа жергедай яз Россиядикайни,  жувахъ бинедилай аваз хьайи инанмишвилеривай гьич са миллиметрни зун кьулухъ элкъведач. Аквадай гьаларай, и фикир мукьвал-мукьвал лугьуниз мажбур жеда зун», – лагьана немсерин канцлерди.

Гьа са вахтунда канцлерди Лейпциг шегьердин аэропортуна беспилотникдихъ галаз алакъалу яз арадал атай агьвалатдин патахъай фад-фад Россия тахсирлу ийиз алахъайди хиве кьуна.

Малум тирвал, идалай вилик Германияди Лейпцигдин аэропортунал гуя Россияди гьужумна лагьана тахсир кутунай. РФ-дин Президент Владимир Путина агьвалатдихъ галаз Москвадин гьич са алакъани авачирди лагьана. Уьлкведин регьберди Берлиндин гьукумдардин рахунар Германияда экономикадин муракаб гьаларихъ галаз алакъалу авуна.

Къадагъа

США-дин президент Дональд Трампа Вашингтондинни Оттавадин арада алишверишдин жигьетдай арадал атанвай рази­сузвилерихъ галаз алакъалу яз малумарайвал, Канададин «Bombardier» авиаконцерндин самолетар мад США-да маса гана виже къведач.

«США-да «Bombardier» тешкилатдин затIар маса гудач. Абу­рун суьрсет бес кьадар хъсанди туш», – кхьена Трампа соцсетра.

Гьазур жезва

Мукьвара НАТО-ди Арктикада военный рекьяй тухвай вердишвилерин серенжемди альянс Россиядихъ галаз ягъунриз гьазур жезвайдакай хабар гузва. Ихьтин фикир РФ-дин къецепатан крарин министрдин заместитель Александр Грушкоди «РИА Новости» чешмедиз малумарна.

«Эгер исятда кьиле физвай крарикай гьакъикъидаказ рахайтIа, абур Россиядихъ галаз ягъунар авуниз аквазвай гьазурвилер я», – лагьана ада. 

Дипломатди и кьуьруькар военный рекьяй авай мумкинвилер къалурун тирди къейдна.

Малум тирвал, 26-августдилай 4-сентябрдалди Британияди, США-ди ва Норвегияди, НАТО-дин «Арктикадин къаравул» серенжемдин сергьятра аваз, Ян-Майен островда вердишвилер кьиле тухвана.

Россиядин МИД-дин кьил Сергей Лаврован гафаралди, ихьтин гьерекатри ачухдаказ Россиядиз къурху гузва ва яракьлу кьушунрин женгер арадал атунин мумкинвал артухарзава. Моск­вади лагьайтIа, ислягьвал хуьниз майилвалзава.

Пис шартIар яз гьисабзава

Верховный рададин депутат Анна Скороходан гафаралди, къалмакъал акъвазарунин патахъай Вашингтонди Киевдиз нагьакьан шартIар теклифзава. «…Абур виликанбурулайни пис шартIар гваз атана», – лагьана депутатди. Адан гафар «РИА Новости» чешмеди раижзава.

Депутатди шикаятзавайвал, США-ди гила Украинадивай къакъатай мулкар чпинбур яз амачирди гьисабун ва конституциядик дегишвилер кутун истемишзава. 

"Лезги газет"