Эхиримжи вахтара аялрин итиж шииратдинни гьикаятдин эсерар фасагьатдаказ, устаддаказ кlелунал желбзавай конкурсар мукьвал-мукьвал тешкилзава.

Къе, 12-мартдиз, Докъузпара райондин Учугъчай хуьруьн юкьван мектебда «Чан алай классика» тlвар алай Вирироссиядин жегьил кlелдайбурун конкурсдин райондин пай кьиле фена.

Конкурс мектебра кlелзавайбурун арада эдебиятдин классикадин эсерар кlелунин, машгьур ва таблигъ авунин, жемиятдин итиж ктабханайрал желбунин, бажарагълу аялар винел акъудунин, абуруз куьмек гунин макьсаддалди тухузва.

Конкурсда Усугъчайдин, Миграгъ-Къазмайрин, Миграгърин, Цlийи-Каракуьредин, Каракуьредин, Къурушрин ва Мискискарин мектебра кlелзавай 21 аялди иштиракна.

Конкурсдин райондин паюнин нетижада жуьреба-жуьре классрай агъадихъ къалурнавай аялар гъалиб хьана: Усугъчайдин мектебдин ученица Сурагьи Мухтарова, Миграгъ-Къазмайрин мектебдин ученица Гуьлзара Камалова ва Цlийикаракуьредин мектебдин ученица Багьаханум Шихкеримова.

Къейд ийин, аялрин кlелунин устадвилиз къимет гайи жюридин дестедик райондин образованидин управленидин ИМЦ-дин заведующий М. Магьмудов, методистар тир О.Османов ва Т.Муллина, ктабханадин заведующий З.Самедова квай. Конкурсдин вири иштиракчияр грамотайралди къейдна.

Гъалиб хьайибуру 4-апрелдиз Махачкъалада кьиле фидай республикадин паюна иштиракда.

Чи мухбир