Россиядин халкьарин садвилинди яз малумарнавай алай йисаз талукьарнавай серенжемри жуьреба-жуьре пешейрин ва яшарин инсанар санал агудзавай мярекатар кьиле тухун давам жезва. Ахьтинбурук и йикъара Россиядин ФСИН (Федеральная служба исполнения наказаний) Дагъустанда авай управленидин 2-нумрадин СИЗО-дин (силисдин изолятор) къуллугъчийри ва Дербентдин В.А. Эмирован тIварунихъ галай кадетрин корпусдин аялри санал иштиракай «Аскердиз куьмек» серенжемни акатзава.
Дугъриданни, кадетар чпин кIвалахдив рикI гваз эгечIнавай. Алай вахтунда Украинада дяведин махсус серенжемда иштиракзавай чи ватанэгьлийрин тIварарихъ кагъазра абуру разивилин ва сагъ-саламатдиз ватандиз хтунин рикIиз таъсирдай чими келимаяр кхьенвай. Чпин насигьатчийрин регьбервилик кваз абуру окоприн шемерни гьазурнавай.
«Гьар са аскердиз чир хьун лазим я хьи, абур кIвалера, чпин хизанра гуьзлемишзава. Чна кхьенвай кагъазар ва гьазурнавай шемер чи рикIерин кIусар я абурув агакьарзавай. Шем гьакIан са парафиндин банка туш, чна окопра йикъарни йифер акъудуниз мажбур хьанвай, чи ватан хуьзвай кьегьалриз рекье твазвай умудлувилин экв, абурун рикIериз нур я. Къуй чи кагъазрин цIарари ва шемери ватан хуьзвайбурун руьгь хкажрай!» – алхишзава кадетри.
Гьазурнавай пишкешар гуманитарный куьмекдик кваз СВО-диз рекье тун патал волонтёррал агакьарнава. «Аскердиз куьмек» серенжем неинки чи умуми кардик пай кутун, гьакIни акьалтзавай несил ватанпересвилин руьгьдаллаз тербияламишунин кардани важиблу тарс я.
«Чаз, кадетриз ва абурун муаллимриз, аскерриз куьмек авун – им гьакIан серенжем туш. Адан чIехи мана чна гьар сада Ватандиз къуллугъ авунин пак адетар давамарзавайди, аскеррин далудихъ чун, вири ватанэгьлияр, галайди къалуруникай ибарат я. Аялди вичин гъилералди кагъаз кхьидайла ва я окопдин шем гьазурдайла, ада неинки аскердиз чимивал гудай затI гьазурзава, гьакIни къе Ватан хуьзвайбурун вилик вичин жавабдарвални гьиссзава. Россиядин халкьарин садвилин йисуз ихьтин серенжемрихъ мадни еке метлеб ава, абуру зурба уьлкведин халис гражданар, ватанпересар чIехи ийиз куьмекзава, — къейдзава кадетрин корпусдин директордин тербиядин рекьяй заместитель Жабраил Абдуллаева.
Серенжемдин нетижаяр кьадайла, 2-нумрадин СИЗО-дин начальникдин заместитель, къенепатан къуллугъдин майор Борис Келбиханова къейд авурвал, СИЗО-дин къуллугъчияр ва кадетар — жуьреба-жуьре несилрин сагьибар – саналди чи аскерриз куьмек авунин умуми макьсадди агудзава. Россиядин халкьарин садвилин йисуз чи тупламишвал гьар са карда мадни мягькемди хьана кIанда.
Регина Семедова
