13-мартдиз ахцегьвийрин уьмуьрда лишанлу вакъиа хьана: хуьре тамашачияр патал ацукьдай 1500 чка авай спортдин чIехи комплекс ачухуниз талукьарнавай мярекат кьиле фена. РД-дин Кьил Сергей Меликован тапшуругъдалди ана Дагъустандин Гьукуматдин Председатель Абдулмуслим Абдулмуслимова, вице-премьер Нариман Абдулмуталибова, РД-дин хуьруьн майишатдин ва недай суьрсетдин министр Мухтарбий Аджекова ва масабуру иштиракна. ЧIехи объект «Хуьруьн мулкар комплекснидаказ вилик тухун» федеральный программадин сергьятра аваз эцигнава.
Вичин рахунра А.Абдулмуслимова къейд авурвал, Дагъустанда хуьрер вилик тухунин месэлайриз кьетIен фикир гузва, гьикI лагьайтIа, республикадин агьалийрин умуми кьадардин 55 процент хуьрера яшамиш жезва.
«Хуьрерин агьалийриз къулай шартIар тешкилун патал чун яшайишдин вири хилер вилик тухуз алахънава. Гьа жергедай яз, — спортни. Ачухдиз лугьун, къе Ахцегьа ачухнавай хьтин физкультурадинни сагъламвал мягькемардай комплекс Дагъустанда мад санани авач. За квез Дагъустандин Кьил Сергей Меликован тIварцIихъай пак рамазандин варз алукьун рикIин сидкьидай мубаракзава.
За квевай са карни тIалабзава: куьн и комплексдив къайгъударвилелди эгечI, ам хуьх. Спортдал машгъул хьухь. Къуй и спорткомлексдай уьлкведин, Европадин, дуьньядин дережадин, Олимпиададин къугъунрин чемпионар акъатрай. Ахцегьрин чил гьамиша спортдин рекье къазанмишнавай чIехи агалкьунралдини чемпионралди машгьур я», — лагьана республикадин премьер-министрди.
А.Абдулмуслимова хуьруьн мулкар комплекснидаказ вилик тухун патал кардик кутунвай программа кьилиз акъудиз куьмек гунай РФ-дин хуьруьн майишатдин министерстводин тIварцIихъни разивилин келимаяр лагьана. Адан гафаралди, и программадин куьмекдалди эхиримжи йисара республикада спортдин 80 объект ишлемишиз вахканва.
Эхиримжи йисара Ахцегь районда спортдин мад са шумуд объект кардик акатнава. Кьилди къачуртIа, Цуругърин хуьре — мини-футболдин майдан, Хуьруьга мини-футболдин майданни галай спорткомплекс ачухна.
Ахцегьа эцигнавай спорткомплексдин дарамат 2 гьавадикай ибарат я, адан умуми майданди 3 агъзур кв. метр тешкилзава. Санлай къачурла, объект эцигуниз 147,5 миллион манат пул чара авунвай: 135,7 миллион — федеральный, 11,8 миллион республикадин бюджетрай. Ина спортдин чIехи дережадин акъажунар кьиле тухудай ва волейбол, баскетбол, футбол къугъвадай, залан атлетикадал, боксдал ва спортдин маса жуьрейрал машгъул жедай мумкинвилер, шартIар ава.
Къейд ийин хьи, 13-мартдиз Дагъустанда аялрин цIийи кьуд бахчани кардик акатна. Абдулмуслим Абдулмуслимова интернетдин алакъадин куьмекдалди абур ачухунин мярекатрани иштиракна.
Мектебдиз фидалди гузвай образованидин цIийи идараяр Избербаш (250 чка авай), Дербент шегьерра (200 чка авай) ва Гуниб (60 чка авай), Ботлих (100 чка авай) районра ачухнава. Абур РФ-дин Президент Владимир Путинан теклифдалди арадал гъайи милли «Демография» проектдин сергьятра аваз эцигнава.
Избербашда бахча ачухунин мярекатда РД-дин образованидин ва илимдин министр Ягья Бучаева, шегьердин мэр Мегьамед Исакьова, РД-дин Халкьдин Собранидин депутатри — Гьабибула Мегьамедовани Али Алиева иштиракна. Гуниб райондин агьалийриз цIийи бахча мубаракиз РД-дин Гьукуматдин Председателдин заместитель Муслим Телякавов, РД-дин образованидин ва илимдин министрдин заместитель Халид Нурмегьамедов ва масабур фенвай. Дербентда цIийи бахча РД-дин Халкьдин Собранидин образованидин ва илимдин комитетдин председатель Елена Павлюченкоди, РД-дин образованидин ва илимдин министрдин заместитель Аида Далгатовади ва шегьердин мэр Рустамбег Пирмегьамедова ачухна. Ботлих райондин Миарсо хуьруьн агьалийриз бахча кардик акатун РД-дин Гьукуматдин Председателдин заместитель Ризван Гъазимегьамедова мубаракна.
Мярекатрикай гегьеншдиз Дагъустандин Гьукуматдин официальный сайтдай кIелиз жеда.
Агьмед Магьмудов
