2-5-октябрдиз Дербент шегьерда «ЧIехи бубайрин ирс» лишандик кваз регионрин арада тешкилзавай тарихдинни ватанпересвилин IV форум кьиле фида. Мярекат миллетрин крарин рекьяй Федеральный агентстводин, миллетрин арада алакъай­рин рекьяй РФ-дин Президентдин патав кардик квай советдин ва Россиядин халкьарин кIвалин куьмекдалди лезгийрин милли медениятдин федеральный автономияди (ФЛНКА) тухузва. Форумдин кьилин амадаг меденият, илим ва образование вилик тухуз куьмек гузвай «Национальное возрождение» фонд я.

Алай йисуз, форумдин сергьятра аваз, веревирддай месэлайрин арада Россиядин халкьарин чIалар хуьнин, вилик тухунин месэлани ава. Кьилди­ къачуртIа, 4-октябрдиз лезги чIа­лаз талукьарнавай элкъвей стол жеда. Адан кIвалахда лезги чIалан алимри, муаллимри, шаиррини гьикаятчийри, СМИ-рин векилри ва масабуру иштиракда.

Форумдин кIвалахда чпин яшар 18 йисалай алатнавай, аш­къи авай гьар са касдивай иштиракиз жеда. Тешкилатчийрин алакъадин нумра: +7 925 443-54-46.

«Лезги газет»