19-февралдиз, дидед чIалан Международный йикъаз талукьарна, Кьурагь райондин КIирийрин хуьруьн умуми образованидин юкьван спортдин школа-интернатда (СОСШ-интернат) райондин мектебрин 11-классра кIелзавай аялрин арада лезги чIалайни литературадай олимпиада кьиле фена. Мярекатдин тешкилатчи “Лезги газетдин” редакция тир.
Олимпиадада хайи чIалай дерин чирвилер авай 11 аялди иштиракна.
“Лезги газетдин” редакцияди ихьтин олимпиада сад лагьай сефер яз тухвана. Газетдин кьилин редактордин гафаралди, гележегда ихьтин серенжемар Кьиблепатан Дагъустандин маса районрани тешкилда.
“Хайи чIалан гафар чна аял чIаварилай дидедин чими гьиссерин лай-лайрихъ, лирлийрихъ галаз кужумзава. Дидед чIал дуьнья, маса чIаларни чирун патал умудлу алат, куьлег я. Багъри чIал хъсандиз чир хьуни чак дамах кутазва, руьгь мягькемарзава. Ам хуьн ва еримлу авун чи виридан буржи я. Ихьтин мярекатар кьиле тухуналди, чаз хайи чIаларин месэлайрал жемятдин фикир желб ийиз кIанзава. Виридаз малум тирвал, эхиримжи йисара акьалтзавай несилдин векилривай, иллаки шегьердин чкада, хъсандиз хайи чIалал рахаз жезвач. Им гьар са чIал патал еке хаталувал я. Лайихлу дережада аваз серенжемар кьабулунин игьтияж ава: дидед чIаларин гьакъиндай къайгъударвал малумарун, хайи чIалариз талукь кьилдин къанун тестикьарун, мектебра дидед чIаларин тарсариз чара авунвай сятерин кьадар артухарун… Халкь патал кар алай, кьилин къуват, ярж, ивир чIал тирди рикIелай ракъурна виже къведач. 11-классда кIелзавай аялрин арада олимпиада тешкилунихъни са шумуд макьсад ава: лезги чIалаз пара итиж ийизвай аялар винел акъудун, акьалтзавай несилар хайи чIалал желб авунин карда гьевесламишун, яратмишдай алакьунар авай аялриз чпин бажарагъ раиждай мумкинвал гун, лезги чIал машгьур авун. Эгер олимпиададин иштиракчийрикай мектебдилай кьулухъ Дагъустандин филологиядин факультетда кIелунар давамардай фикирдал алай аялар аваз хьайитIа, чи газетдин редакция абуруз и карда вири жуьредин куьмекар гуз гьазур я”, — лагьана газетдин кьилин редактор Мегьамед Ибрагьимова.
Олимпиада ачухдайла, ада къейд авурвал, Дагъустандин милли чIаларал акъатзавай изданийра жегьил пешекаррин кьитвал ава. Хъсандиз чIал чидай, яратмишдай алакьунар авай жегьил пешекарар гьазурун милли редакцийрин вилик акъвазнавай асул месэлайрикай сад я.
“Алакьунар авай жегьилар желб авун патал “Лезги газетдин” редакцияди алай йисуз республикадин вузра кIелзавай студентрин ва мектебра чирвилер къачузвай аялрин арада конкурсар малумарнава. Виридалайни сечмебур гележегда газетдин редакцияда кIвалахунални желбда”, — алава хъувуна М.Ибрагьимова.
Олимпиададин иштиракчийри лезги чIалай ва литературадай тестерин къайдада ганвай тапшуругъар тамамарна, тест-диктант ва “Зи рикI алай шаир” темадай сочинение кхьена.
Нетижада 1-чкадиз КIирийрин хуьруьн СОСШ-интернатдин ученица ФатIимат Рагьманова, 2-чкадиз Ашарин хуьруьн юкьван мектебдин ученик Бирем Абдурагьманов лайихлу хьана, 3-чка Аладашдин юкьван мектебдин ученица Маина Османовади кьуна. Гъалибчийриз вад, пуд, кьве агъзур манатдин кьадарда аваз пулдин премияр, 2013-йисуз С.Юзбеговадин ва Н.Абдулмуталибован редакциядик кваз чапдай акъатнавай “Урус чIаланни лезги чIалан гафарганар”, Муьзеффер Меликмамедован “Гьажи Давуд” ктабар гана. Амай иштиракчийриз лезги шаирринни гьикаятчийрин ктабар пишкешна.
Олимпиададин эхирдай Мегьамед Ибрагьимова и серенжем тешкилунин карда куьмекар гунай Кьурагь райондин администрациядин образованидин управленидиз, образованидин отделдин информационно-методический центрадин начальник Кьасум Абдулхаликьоваз, КIирийрин хуьруьн СОСШ-интернатдин директор Надир Тагьироваз, эцигунардай “Ардаг” фирмадин регьбер Рагьмали Алиеваз сагърай лагьана.
Агьмед Магьмудов
