Ахцегьа, хуьруьн майишатдин хиле гьакъисагъвилелди зегьмет чIугуналди, бул бегьерар битмишарзавай инсанар тIимил авач. Нурудин Манатиловни ахьтинбурукай сад я.
Къейд ийин, алай вахтунда райцентрада ва гьакI хуьрера гьатта чилин бязи гъвечIи участокрин иесийрини гьар жуьре багьнайралди, яни яд авач, битмишарзавай бегьер къиметсуз хьанва, ам маса гунни четин я лугьуз, чпин кIвачихъ галай бегьерлу чилер гадарнава. Винидихъ къейднавай хьтин четинвилерал бязи вахтара расалмиш жезватIани, зегьметдал рикI алай инсанри, са куьнизни килиг тавуна, къастунал кIевивал авуналди, дагъдин этегрик лакар атIана, багълар кутуна, бул бегьерар къачузва.
Нурудин Манатилова гьеле 1992-йисуз 1,2 гектар чил арендада кьуна, ана къелемар акIурна. Багъда цанвай ичерин, чуьхверрин къелемрин чIехи пай ада вичи тIур гана арадал гъанвайбур я. Адан багъда бегьер гъизвай ичерин, машмашрин, хутарин, шефтелийрин, жумарин тарарни ава.
Гатун чими вахтунда (багъдиз яд Грарин кIамай къачуна гузва) цин кьитвал авайла, ада гзаф вахтара багъ йифиз дигизва. Алатай йисуз и зегьметкешди Дербент, Махачкъала, Грозный шегьерра 6 тонн ичер, 30 ящик къенсияр, 40 ящик «чIулав венгерка» хутар маса гана. Идалайни гъейри, ада и участокда 200 метр яргъивал алаз 2 жерге уьзуьмлухни кутунва. ЦIи Н.Манатилова ципицIрин сифте бегьерни къачуна.
Алайди зулун вахт ятIани, адаз акъвазун чидач. Къведай йисан бегьердин бине кутун патал Нурудина вичин багъда агротехникадин гьар жуьре серенжемар кьиле тухузва. ХъуьтIуьз ичер хуьн патал ада 1,5 метр деринвал авай гьамбарханани туькIуьрнава.
Багъманчиди ина гьакI гьар йисуз 400-лай виниз векьин туькерни гьазурзава. Адахъ 30 мални ава, абурукай 22 ацадай калер я. Гатуз ада некIедикай ниси ийизва, нек ва як маса гузва. Малариз 22 метр яргъивал ва 4 метр гьяркьуьвал алай тевле эцигнава.
КIвалин вилик квай бустанда Нурудина са шумуд жуьре цуькверни битмишарзава. Мехъерарзавайбуру, хайи югъ къейдзавайбуру, идарайра мярекатар тешкилзавайбуру адавай цуьквер масани къачузва. Идалайни гъейри, адахъ ина паркара цаз жедай хейлин сортарин къацу кул-кусарни ава. Къуй Нурудинахъ мадни еке агалкьунар хьурай! Ихьтин зегьметкешар чешне къачуниз лайихлу я.
Рагьидин Эминов
