Алакъаяр мягькемарда
21-сентябрдиз Москвада, Россиядин халкьарин кIвале, Лезгийрин милли медениятдин федеральный дережадин автономиядин (ФЛНКА) векилри РФ-дин Президентдин патав кардик квай Дагъустандин Гьамишалугъ векилханадин делегациядихъ галаз гуьруьш кьиле тухвана.
РикIел хкин, алай йисан 30-июндилай винидихъ тIвар кьунвай векилханадин регьбердин везифаяр бинеяр Мегьарамдхуьруьн райондин Къуюстанрин хуьряй тир Руслан Нагъиева тамамарзава. Ам Украинада кьиле физвай дяведин махсус серенжемдин иштиракчи, юстициядин полковник я. Идалай вилик Р. Нагъиев Дагъустандин суддин департаментдин кьиле авай.
Векилханадин делегациядик, Руслан Нагъиевалай гъейри, адан заместитель Гьажимурад Кажлаев, жемиятдин алакъайрай ва гражданвилин жемиятдин институтрихъ галаз алакъаяр хуьдай отделдин начальник Зоя Ханова, векилханадин регьбердин меслятчи Абдулла Гьажиев, Москвадин вузра кIелзавай студентар квай.
ФЛНКА-дин патай гуьруьшда автономиядин президент Васиф Гьасанова, вице-президент Гьуьсен Шагьпазова, жегьилрин департаментдин кьил Залина Гьажиевади ва тешкилатдин активистри иштиракна.
Гуьруьшдал Васиф Гьасанова тешкилатди эхиримжи йисара кьилиз акъуднавай кар алай са шумуд проектдикай суьгьбетна. Кьилди къачуртIа, ФЛНКА-дин президентди хайи чIал хуьнин месэлайриз иллаки кьетIен фикир гузвайди къейдна. Мисал яз, ада, автономиядин алахъунар себеб яз, РФ-дин миллетрин крарин рекьяй кардик квай федеральный Агентстводин (ФАДН) куьмекдалди Яндексдин базадик кутун патал урус чIалай лезги чIалаз 100 агъзурдав агакьна предложенияр таржума авунихъ галаз алакъалу проект къалурна. Хайи чIалакай ихтилат кватайла, къейд ийин хьи, эхиримжи йисара ФЛНКА-ди Кьиблепатан Дагъустандин хуьрера гатун вахтунда «Лезги мектеб» проектни кьилиз акъудзава, Москва шегьердин ва областдин вузра кIелзавай лезги студентрин арада хайи чIалал виридалайни хъсан эссе кхьинай конкурс тешкилзава. Са шакни алачиз, и проектрихъни лезги чIал хуьнин ва вилик тухунин карда еке метлеб ава.
Васиф Гьасанова гьакIни ФЛНКА-ди ФАДН-дин куьмекдалди СВО-дин иштиракчийрикай – дагъустанви игитрикай документрин бинедаллаз «Дух победителей» тIвар алай фильм гьазурнавайдакай хабар гана. Ам сифте яз сентябрдин вацра Россиядин халкьарин кIвале къалурна.
РФ-дин Президентдин патав кардик квай Дагъустандин Гьамишалугъ векилханадин делегацияни ФЛНКА идалай кьулухъ амадагвилин алакъаяр мягькемарунин гьакъиндай меслят хьана. Гуьруьшдин эхирдай ФЛНКА-дин векилри мугьманриз рикIел аламукьдай савкьатар пишкешна.
Агьмед Магьмудов