Дуллух тIимил тир хизанривай 1-майдилай аялриз пулар гудай чарар-цIарар туькIуьриз жеда. Дагъустандин Пенсийрин фондунай виридалайни мукьвал-мукьвал гьалтзавай суалриз жавабар гана.

Арза гьиниз вугуда?

Гьар вацра гузвай пулунин гьакъиндай арзаяр 2022-йисан 1-майдилай ­кьабулзава. И вахтунилай вилик арза гунин лазимвал авач, гьикI хьи, 1-май алукьдалди амай вахтунда аялар кьилди кIвачел акьалдарзавай диде-бубаяр патал суддин къарар авайла, алиментар тайинарун патал арзайриз килигзава.

8 йисалай 17 йисалди яшда авай аял­риз пулар гунин арзаяр 1-майдилай кьабулзаватIани, арза гайила, пул вилик квай вацрандини, яни апрелдилай гуда. Мадни гъавурда акьадайвал лагьайтIа, и чIавуз кьве вацран (апрель ва май) пул санал къведа. Са шартIуналди: эгер аялдин 8 йис тамам хьанватIа, амма 17 йисалай виниз туштIа.

Майдилай башламишна, арза “Госкъуллугъар” порталда, адан талукь форма ЕПГУ-да пайда хьайила, гьакIни ПФР-диз ва я МФЦ-диз фенани гуз жеда.

И пулар низ гуда?

Гьар вацра гудай пул къачудай ихтияр диде-бубадикай садаз ва я аялдин закондалди тайинарнавай къаюмвалзавайдаз — Россиядин Федерациядин гражданиндиз ва РФ-дин мулкарал гьамишалугъ яша­миш жезвайдаз ава. Амма — шар­тIу­налди: аял вични Россиядин Федерациядин гражданин ва РФ-дин мулкарал яшамиш жезваз хьун лазим я.

Пулунин кьадар гьикI тайинарда?

Пулунин кьадар региондин яшайиш патал тайинарнавай агъа кIанин кьадардин 50% тайи­нар­да. Дагъустанда яшамиш хьунин агъа кIа­нин пулунин кьадар 11 499 манат я.

Эгер аялдиз гузвай пул регионда яшамиш хьунин агъа кIанин кьадардин 50% тайинарайла, хизандин гьар са касдал ацалтзавай дул­лух регионда тайинарнавай агъа кIа­нин кьадардилай тIимил яз хьайитIа, аялдиз регионда яшамиш хьунин тайинарнавай агъа кIа­нин кьадардин 75% гуда.

Эгер аялдиз регионда тайинарнавай агъа кIанин кьадардин 75%  тайинарайла­, хи­зандин гьар са касдал ацалтзавай дул­­лух регионда яшамиш хьун патал та­йи­­нар­навай агъа кIанин кьадардилай тIимил­ яз хьайитIа, аялдиз регионда та­йи­на­р­навай агъа кIанин кьадардин 100% гуда.

Аялриз гузвай пулар къачун патал банкдин “МИР” картадихъ галкIурнавай счет хьун лазим я.

Хизандин гьар са касдал ацалтзавай дуллух гьикI гьисабда?

Къайда ихьтинди я: арза гайи йикъал­ къведалди вилик квай 4 варз хкудна, адалай виликан 12 вацра хизандин гьар са члендиз атанвай дуллух (мисал яз, эгер арза майдиз гузватIа, адалай вилик­ квай 4 варз — апрель, март, февраль, ян­варь хкудда, 2021-йисан 12 вацра атай дуллух гьисабда) ва хизанда авай ксарин кьадар гьисаба кьада.

«Лезги газет»