2-чка кьуна
Мукьвара Севастополь шегьерда «Книга – это бессмертие» лишандик кваз международный дережада аваз кьиле фейи эдебиятдин фестиваль акьалтIна. Фестивалдин «Художественный перевод» номинацияда Дагъустандин халкьдин шаир Сажидин Саидгьасанован «Мерд Алидикай мах» тIвар алай ктаб урус чIалаз элкъуьрай Астрахандай тир шаир, таржумачи Сергей Фёдорова 2-чка кьуна.
Сажидин Саидгьасановахъ аялар патал кхьенвай эсерар гзаф ава. Абурукай хейлинбур халкьдин гегьенш къатариз раиж хьанва, газетра, журналра чапнава, кьилдин ктабар яз чапдай акъатнава. «Мерд Алидикай мах» шаирди жегьил гададин мердвиликай шиирралди кхьенвай эсер я.
«Книга – это бессмертие» фестиваль Симферополь шегьерда авай «Доля» чапханади тешкилзава. Алай йисуз кьиле тухвай фестивалдиз эсерар 1-июлдилай 1-августдалди «Шиират», «Гьикаят», «Яратмишунрин таржума», «Аялар патал эдебият» номинацийрай кьабулна. Иштиракайбурун арада Россиядин жуьреба-жуьре регионрай тир шаирар, гьикаятчияр, таржумачияр авай. Са шумуд юкъуз давам хьайи фестиваль цIи Россиядин халкьарин садвилин йисаз бахшнавай.
Чна гьуьрметлу шаир Сажидин Саидгьасановаз, адан къелемдикай хкатай мах урус чIалаз элкъуьрай Сергей Фёдороваз нубатдин агалкьун мубаракзава.
Агьмед Магьмудов