Августдин сифте кьилелай башламишна, Россельхознадзордин Дагъустан Республикада авай Управлениди Ирандай, Туьркиядай ва Азербайжандай гъизвай, санлай къачурла, 14 агъзур тонндилай виниз тир набататрин суьрсет авай 806 машин ахтармишна.

Идаради хабар гузвайвал, метягь вах­туналди хуьдай «Виадук» гьамбарханада карантиндинни фитосанитариядин гуьзчивал тухудайла, зиянкар гьашаратар квай нектаринар, машмашар ва пIинияр – санлай къачурла, 39 тонн къадагъа тир суьрсет жагъанва.
«ВНИИКР» ФГБУ-дин Дагъустандин филиалдин лаборато­рия­ди кьиле тухвай ах­тармишунрин нетижада метягьдик рагъ­экъечIдай патан плодожорка гьашарат квайди тестикьарна. Ви­ри и суьрсет, карантиндин сергьятра аваз, михьи авун патал (фу­мигация) рекье туна ва гуьгъуьнлай уьлкведин мулкунал ахъайна.

Идалайни гъейри, документар ва суьрсет ахтармишунин нетижада ам тунвай къапарал лазим тир лишанар (маркировка) алачирди винел акъудна. Гьаниз килигна, яни тамам делилар тахьун себеб яз, санлай къачурла, 60,7 тонн метягь ам рекье тунвай уьлкведиз элкъуьрна рахкурнава.

Чи мухбир