«Рекьизва» чил, квахьзава  хуьр,

Регъвни гумач гудай чаз гъуьр,

ЧкIиз ава мискIин, кIвалер,

ЧIафари кьаз хуьруьн рекьер.

Сагьиб амач къебристандихъ,

ТIемни амач ктIай тандихъ,

Ялгъуз туна, гадарнава,

РикIикайни квадарнава.

ЧкIанва сал – амач хуьлер,

Амач цуьквер – хьанва вергер.

Шехьиз ава цавар, чилер,

Лугьуз: «ВутIна куьне лекьер?»

Ни хкурай рикI чи хуруз?

Рахун хъсан – кIвалах чIуруз,

ЧкIизва халкь, къугъуриз мез,

Рази я чун кьуру фу нез…

Къе чилик ква бубаяр чи,

ВикIегь, тIарам рухваяр чи,

Агаж жезва акваз чи югъ,

Гьикьван хьурай какур чи юкь?

"Лезги газетдин" 2023-йисан 24-нумрадай.